अफगानिस्तानया पञ्जशीरय् २० म्ह सर्वसाधारणया हत्या

एजेन्सी- अफगानिस्तानया पञ्जशीर उपत्यकाय् तालिबानं २० म्ह सर्वसाधारणयात स्यानाबिउगु जानकारी बिबिसीं बिउगु दु । तालिबान विरोधी पुचः एनआरएफं पञ्जशीरय् तालिबानविरुद्ध युद्ध याःगु खः । तालिबानतय्सं थ्व थासय् सञ्चार सेवा बन्द यानातःगु खः । सञ्चार सेवा बन्द यानातःगु हे इलय् तालिबानं २० म्ह सर्वसाधारणयात स्याःगु दसि बिबिसीं लुइकूगु खः ।

बिबिसीं सार्वजनिक याःगु छगू भिडियोय् तालिबानया लडाकुतय्सं सैन्य वसः पुनातःम्ह छम्ह मनूयात घेरे यानाः गोली कयेकूगु खनेदु । पञ्जशीरय् सैन्य वसः पुनेगु सामान्य जुगूलिं सीम्ह मनू सर्वसाधारण खः लाकि सैनिक खः धयागु सीमदु । अथे हे बिबिसीया कथं तालिबानं एनआरएफयात सिमकार्ड मिल धकाः छम्ह स्थानीय पसलेयात नं यातना बियाः स्याःगु दु ।

थ्वया हे दथुइ विश्वन्यंक च्वंपिं अफगानी मिस्तय्सं तालिबानं मिस्तय्सं विश्वविद्यालय वनेबलय् म्ह छम्हं त्वपूगु ‘हिजाब’ वसः पुनेमाः धकाः याःगु निर्णयया विरोध याःगु दु । विश्वन्यंक च्वपिं अफगानी मिस्तय्सं अनलाइन क्याम्प शुरु यानाः ‘जिगु वसतय् थिइ मते’ व ‘अफगानिस्तान संस्कृति’ थेंज्याःगु ह्यासट्याग तयाः विरोध यानाच्वंगु दु । अफगानी मिस्तय्सं सञ्चार माध्यमय् रंगीन व पारम्परिक वसः पुनाः किपा पोष्ट व शेयर यानाच्वंगु दु । छुं ई न्ह्यः तिनि अफगानिस्तानय् च्वंपिं मिस्तय्गु छगू पुचलं तालिबानया समर्थनय् म्ह छम्हं त्वपूगु हाकुगु वसः व बुर्का पुनाः ¥याली पिकाःगु खः ।

सामाजिक सञ्जालय् थ्व ¥यालीया विरोध यासें थीथी देसय् च्वपिं अफगानी मिस्तय्सं थ्व अफगानया परम्परा मखु धासें संस्कृति रंगीन व भलादमि पहः वःगु वसः अफगानिस्तानया पारम्परिक वसः धाःगु दु । सामाजिक सञ्जालय् अफगानिस्तानया राष्ट्रिय नृत्य अट्टनया पेन्टिङ्गया किपा नं तयातःग दु । थ्व किपाय् मिस्त रंगीन वसः पुनाः प्याखं हुलाच्वंगु खनेदु ।

सम्बन्धित बुखँ

LEAVE YOUR COMMENTS