‘जि क्लोन मखु मनू हे खः’
‘जि म्वानाच्वनागु दु’ थ्व गुगुं बाखं व चिनाखँया शीर्षक मखु । थ्व ला छम्ह राष्ट्रपतिं बिउगु अभिव्यक्ति खः । अर्थात छम्ह राष्ट्रपतिं थःगु बारे न्यंगु न्ह्यसःया लिसः बीगु झ्वलय् थुकथं थः ‘असली राष्ट्रपति जूगु व म्वानाच्वनागु’ अभिव्यक्ति बीमाःगु खः ।थुकथं थःगु बारे अभिव्यक्ति बिउम्ह राष्ट्रपति खः नाइजेरियाया राष्ट्रपति मोहम्मदु बुहारी ।
पोल्याण्डय् च्वना वयाच्वंपिं नाइजेरियन समुदाययात संबोधन यायेगु झ्वलय् राष्ट्रपति बुहारीं ‘थः म्वानाच्वनागु दु’ धकाः घोषणा यायेमाःगु स्थिति खः । छुं दिं न्ह्यः पोल्याण्डय् जलवायु सम्मेलन जूगु खः । उगु सम्मेलनय् ब्वति कायेत वंम्ह राष्ट्रपति बुहारीं अन च्वनाच्वंपिं थःगु देय्या नागरिकलिसे जूगु भेटघाटया इलय् उकथं प्रष्टीकरण बीमाःगु खः ।
भेटघाटय् नाइजेरियन समुदायं राष्ट्रपति बुहारीयात छगू अजू चायापुगु न्यंगु जुयाच्वन । इमिसं ‘छि धाथेंया राष्ट्रपति बुहारी खः कि राष्ट्रपति बुहारीया क्लोन खः ?’थ्व न्ह्यसःया कयाः स्पष्ट यायेगु झ्वलय् नाइजेरियाया राष्ट्रपति बुहारीं थः क्लोन मखसे धाथेंया राष्ट्रपति बुहारी हे जूगु घोषणा याःगु खः ।
थः वास्तविक राष्ट्रपति बुहारी मखसे वया क्लोन जक जूगु धकाः थीथी कथंया अफवाह न्यना वनाच्वंगुयात राष्ट्रपति बुहारीं खण्डन तकं यायेमाःगु स्थिति वःगु खः । पोल्याण्डय् च्वनाच्वंपिं नाइजेरियनतय्सं न्यंगु न्ह्यसःयात कयाः राष्ट्रपति बुहारी ट्विटरय् ‘पोल्याण्डय् नाइजेरियन समुदायलिसेया छगू भेटघाटया इलय् जितः छगू न्ह्यसः न्यन कि जि क्लोन खः वा धाथेंया मनू ।
अज्ञानतां जायाच्वंगु अफवाह अजू चायापु मजू । छाय्कि जि थगुने अस्वस्थताया कारणं विदाय् च्वंच्वनागु खः । अबलय् मनूतय्सं जि सित धकाः तायेकूगु खः ।’‘जि धाथेंया मनू खः, जि नाइजेरियाया राष्ट्रपति बुहारी हे खः, वयागु क्लोन मखु, थ्व विश्वास जिं छिकपिंत बियाच्वना । नापं जिं थःगु ७६ दँ बुन्हि नं याकनं हनेत्यनागु दु’ राष्ट्रपति बुहारीं च्वःगु खः ।
LEAVE YOUR COMMENTS