
अमेरिकी राष्ट्रपति डोनाल्ड ट्रम्पं अमेरिकाय् दुहां वइपिं आप्रवासीतय्त पनेगु निंतिं थप पलाः मल्ह्वन धाःसा मेक्सिकोलिसेया सीमा बन्द यायेगु ख्याच्वः बियादीगु दु । यदि सीमा बन्द जुल धाःसा वये वनेगु अवरुद्ध जुइगु लिसें अर्बौ डलरया व्यापार खर्च जुइगु जुइ । मेक्सिकोया नाका जुयाः अमेरिका दुहां वइपिं आप्रवासीतय् ल्याः अप्वयाच्वंगुलिं ट्रम्पया थ्व ख्याच्वः वःगु खः ।
मेक्सिकोया राष्ट्रपति एन्ड्रेस म्यानवेल लोपेज ओब¥याडोरं धाःसा थ्व विषयय् थः मुठभेडया स्थितिइ फँसे मजुइगु खँ धयादीगु दु । विदेशमन्त्री मार्सेलो एब्रार्डं मेक्सिको अमेरिकाया तःधंगु जःलाखःला जूगु व ख्याच्वःया अधारय् थःपिंसं पलाः मल्ह्वनेगु ट्विट याःगु दु । शुक्रवाः पत्रकारतलिसे खँ ल्हायेगु झ्वलय् ट्रम्प वइगु वालय् थःम्हं सीमा बन्द यायेफूगु धासें थथे यायेत थःत छुं समस्या मदुगु खँ धाःगु खः ।
अमेरिका दुहां वनेत स्वइपिं मनूतय्त पनेगु ज्या अःपुसां मेक्सिकों थ्व सम्बन्धय् छुं ज्या मयाःगु तर्क ट्रम्पया दु । ट्रम्पं थ्व लिपा धुवांधू ट्विट यासें लागू वासःया तस्करी नियन्त्रणय् ध्यबा खर्च यायेगु स्वयां सीमा हे बन्द यायेगु बेश जुइगु खँ धाःगु खः । मेक्सिकों धाःसा आप्रवासनया विषय मेक्सिकोय् निर्भर मजूगु खँ धाःगु दु । राष्ट्रपति ओब¥याडेरं थ्व समस्या मेक्सिकोपाखें मखसे मध्य अमेरिकी देय्पाखें सिर्जना जूगु खँ धयादीगु दु ।
LEAVE YOUR COMMENTS