फिलिपिन्सय् तच्वःगु समुद्री आँधी

थ्व दँया शक्तिशाली टाइफुन म्याङ्कुटं फिलिपिन्सया उत्तरी तटीय क्षेत्रय् विध्वंस न्यंकाच्वंगु दु । वंगु चान्हय् लुजोन द्वीपय् आँधीया कारणं पूवंक मतया आपूर्ति बन्द जूगु दु । २०० किलोमिटर प्रतिघन्टाया वेगं न्ह्याः वयाच्वंगु शक्तिशाली टाइफुन म्याङ्कुट न्ह्याः वयाच्वंगु लँय् ४० लाख स्वयां अप्वः मनूतय् बसोबास दु ।

३३० किलोमिटर व्यास दुगु थ्व आँधीं कमजोर संरचनाय् बांमलाक क्षति याइगु चेतावनी फिलिपिन्सया मौसम अधिकारीतय्सं बीधुंकूगु दु । उमिसं थ्व आँधीया कारणं ६ मिटर तक समुद्री लःबु थहां वयेफुगु व तच्वयेक वा वयेफुगु खँ धाःगु दु । टाइफुन न्ह्याः वयाच्वंगु लँय् लानाच्वंपिं द्वलंद्वः मनूतय्त सुरक्षित थासय् सरे यायेधुंकूगु दुसा कागायान, उत्तरी इसाबेला, अपायाओ व आब्रा प्रान्तय् निगूगु उच्च तहया सतर्कता घोषणा यायेधुंकूगु दु ।

शक्तिशाली आँधी म्याङ्कुट फिलिपिन्सया उत्तरपूवी बगाओय् शनिवाः सुथय् १ः४० बजे दुहां वःगु खः । स्थानीय भासं ओमपोङ धाइगु थ्व आँधी ३५ किलोमिटर प्रतिघन्टाया वेगं उत्तर पश्चिमय् न्ह्याः वनाच्वंगु खँ धाःगु दु । थ्व आँधी आइतवाः न्हिनय् तकया दुने हङकङ दुहां वनीगु अनुमान यानातःगु दु ।

हङकङकया अधिकारीतय्सं आँधी न्ह्याः वयाच्वंगुलिं थ्व आँधीया लँय् लाःगु क्षेत्रया मनूतय्त छेँ दुने हे च्वनाच्वनेत आह्वान याःगु दु । मौसमविद्तय्सं हङकंगया सिमानया् वयाच्वंगु म्याङकुट वंगु छगू दशक दुनेया हे दकलय् शक्तिशाली जुइफुगु खँ धाःगु दु । वइगु मंगलवाः जक थ्व आँधी भचा शान्त जुइगु अनुमान यानातःगु दु । आँधीया कारणं सामुद्रीक व हवाइ यात्रा बन्द यानातःगु दुसा स्कुलत नं बन्द याकेधुंकूगु दु ।