झिम्ह पश्चिमी राजदूततय्त देशं पितिनेगु टर्कीया ख्याच्वः

एजेन्सी- टर्कीं झिम्ह पश्चिमी राजदूततय्त थःपिनिगु देशं पितिनेगु ख्याच्वः बिउगु दु । टर्कीया राष्ट्रपति रेसेप एर्र्दोआनं अमेरिकालिसें झिगू देशया राजदूततय्सं जेलय् लानाच्वंम्ह नागरिक समाजया न्ह्यलुवाःया समर्थनय् संयुक्त विज्ञप्ति पिकाःगुलिं राजदूततय्त देशं पितिनेगु ख्याच्वः बिउगु खः । एर्र्दोआनं टर्कीया विदेशमन्त्रीयात राजदूततय्त थःपिनि देशय् तयेमफइगु जानकारी बियागु धकाः धाःगु दु ।

वंगु सोमवाः झिम्ह पश्चिमी राजदूततय्सं नागरिक समाजया न्ह्यलुवाः ओस्मान काभालाया समर्थन यानाः काभालायात जेलय् तःगुलिं टर्कीइ ग्रहण लाःगु धकाः संयुक्त विज्ञप्ति पिकाःगु खः । संयुक्त विज्ञप्तिइ काभालाया मुद्दा न्यायसंगत ढंग समाधान यायेत नं धयातःगु दु । काभालायात बियातःगु द्वपं पुष्टि मजूसां सन् २०१७ निसें जेलय् तयातःगु दु । काभालायात सन् २०१३ य् सरकार विरोधी ज्या याःगु व सन् २०१६ य् असफल कू याःगु द्वपं दु ।

अमेरिका, जर्मनी, क्यानाडा, डेनमार्क, फ्रान्स, फिनल्याण्ड, न्यूजिल्याण्ड, नेदरल्याण्ड, स्वीडेन व नर्वेया राजदूततय्सं संयुक्त विज्ञप्ति पिकाःगु खः ।