ट्रम्प नापलाकेत वकिलं घुस नल

एजेन्सी अमेरिकी राष्ट्रपति डोनाल्ड ट्रम्पया निजी वकिल माइकल कोहेनं युक्रेनी राष्ट्रपति व ट्रम्प दथुइ भेटवार्ता याकेगु निंतिं गोप्य रुपं प्यंगू लाख डलर ध्यबा काःगु खँ बिबिसी पत्ता लगे याःगु दु ।

दछि न्ह्यव जूनय् ह्वाइट हाउसय् जूगु उगु भेटवार्ता मिले यायेगु निंतिं ज्या याःपिं किएभया मध्यस्थकर्तातय्सं थ्व जानकारी बिउगु खः । युक्रेनी नेता पेट्रो पोरोसेन्कोया निंतिं मध्यस्थकर्ताया ज्या याःपिंसं कोहेनयात ध्यबा बीगु निंतिं ध्यबाया व्यवस्थापन याःगु खः ।
मेखे कोहेनं धाःसा थःत बिउगु द्वपंयात अस्वीकार याःगु दु । राष्ट्रपति पेरोसेन्कोया ज्याकुथिं नं थ्व द्वपंयात झूठ धासें निगू देय् दथुइ स्वापू स्यंकेगु निंतिं थ्व द्वपं बिउगु खँ धाःगु दु ।

दछि न्ह्यव जूनय् जूगु थ्व भेटवार्ता लिपा युक्रेनी राष्ट्रपति स्वदेश लिहां वयेवं हे युक्रेनया भ्रष्टाचार विरोधी निकायं ट्रम्पया चुनावी अभियानया पुलांम्ह व्यवस्थापक पल मानाफोर्ट विरुद्धया अनुसन्धान बन्द यानाबिउगु खः । पोरोसेन्को प्रशासनया छम्ह उच्च गुप्तचर अधिकारीं ह्वाइहाउट भ्रमण न्ह्यः जूगु गतिविधि बारे बिबिसीयात जानकारी बिउगु खः ।