काइली जेनर दकलय् क्वकालिम्ह अर्बपति चौधरीयाके १ खर्ब ९२ अर्बया सम्पत्ति

अमेरिकाया काइली जेनर थःगु बलबुतां संसारया हे दकलय् क्वकालिम्ह अर्बपति जुइत ताःलाःगु दु । फोब्र्स म्याग्जिनं सार्वजनिक याःगु सन् २०१९ या अर्बपतितय् धलखय् २१ दँया जेनरं मेकअप सामानया जक मियाः अर्बपति जूगु खः । वयागु कम्पनी काइली कस्मेटिक्सं थगुने थःगु सामान मियाः ३६ करोड अमेरिकी डलर कमे याःगु खः ।

काइली विश्वय् चर्चाय् वयाच्वनीगु कार्डिसन परिवारया दुजः खः ।२१ दँय् हे अर्बपति धलखय् लायेवं काइलीं फेसबुकया संस्थापक मार्क जुकरबर्गयात नं लिउने लाकूगु दु । जकरबर्ग अर्बपतिया धलखय् लाःबलय् २३ दँ दयेधुंकूगु खः । अर्बपतिया धलखय् लाःम्ह काइलीं फोब्र्सलिसे खँल्हासें धाःगु दु, ‘जिं ला थज्याःगु छुं कथं नं आशा यानागु मदु, अले भविष्यय् जुइ धकाः नं अज्याःगु छुं लक्ष्य तयागु मखु ।

अय्सां थ्व धलखय् लाःबलय् धाथें लय्ताल । जितः सुनां ब्वहल धाप बिउ थें च्वन ।’सन् २०१९ या अर्बपतितय् धलखय् १३१ अर्ब अमेरिकी डलर सहित अमेजनया संस्थापक जेफ बेजोस शीर्षस्थानय् लाःगु दु । बेजोसया कुल सम्पत्ति थगुने स्वयां १९ अर्बं अप्वःगु दु ।तर फेसबुकया संस्थापक मार्क जुकरबर्गया सम्पत्ति धाःसा म्हो जुया वनाच्वंगु दु ।

थगुने ६२.३ अर्ब दुगु जुकरबर्गया सम्पत्ति थुगुसी ८.७ अर्बं कुहां वंगु दु । फेसबुकं गोपनीयता विषययात कयाः थीथी देशय् मुद्दा ल्वायेमाःबलय् वयागु शेयर भाः कुहां वंगु खः । मेखे अमेजनया शेयरया भाः थहां वंगुलिं थुकिया संस्थापक बेजोसं निगूगु थासय् लानाच्वंम्ह अर्बपति बिल गेट्सया स्वयां छुं भचा अप्वः सम्पत्ति अप्वयेकूगु दु ।

माइक्रोसफ्टया संस्थापक गेट्सया सम्पत्ति धाःसा ९० अर्ब डलरं थहां वनाः ९६.५ अर्ब डलर थ्यंगु दु ।मिस्त अप्वलफोब्र्सया गणनाय् लाःपिं २१५३ म्ह अर्बपतित मध्ये २५२ म्ह मिस्त दु । थःगु हे पौरखं दकलय् धनी मिसा जूम्ह चीनया प्रभावशाली घरजग्गा व्यवसायी वू याजुन खः । वयागु सम्पत्ति थ्यंमथ्यं ९.४ अर्ब डलर दु ।

थःगु हे कुतलं अर्बपति जूपिं मिस्तय् ल्याः नं थुगुसी दकलय् अप्वः ७२ म्ह थ्य.गु दु । मेखे अर्बपतित मध्ये दकलय् अप्वः अमेरिकाया ६०७ म्ह दुसा चीनया ३२४ म्ह दु । नेपाःया व्यवसायी विनोद चौधरी थुगुसीया धलखय् १३४९ औं थासय् दु । फोब्र्सया कथं वय्कः छम्ह जक नेपाली अर्बपति खः । चौधरीयाके १.७ अर्ब अमेरिकी डलर बराबरया सम्पत्ति दु । थ्व ल्याखं चौधरीयाके १ खर्ब ९२ अर्ब नेपाली तका बराबरया सम्पत्ति दु ।