खेरसनय् रुसया कब्जा जूगु दाबी

एजेन्सी- युक्रेनया राजधानी किभ, निगूगु तःधंगु शहर खार्किभ, राजधानीया पश्चिमय् लाःगु जोटेमोर, दक्षिणय् च्वंगु खेरसनलिसें थीथी शहरय् रुसी सेनां हमला यानाच्वंगु दु । राजधानी किभय् च्वंगु टेलिभिजन कन्ट्रोल रुमय् नं आक्रमण याःगु दु ।

युक्रेनया अधिकारीतय्सं बिउगु जानकारीकथं खार्किभय् रुसी सेनां याःगु बमबारीइ लानाः २१ म्ह सीगु दुसा ११२ म्ह घाःपाः जूगु दु । खार्किभय् रुसी सेना प्यारासुटं दुहां वःगु खः । अथेहे जोटेमारय् जूगु हमलाय् निम्ह सीगु व १६ म्ह घाःपाः जूगु युक्रेनया अधिकारीतय्सं धाःगु दु ।

थ्व हे झ्वलय् रुसं युक्रेनया खेरसन शहरयात थःपिनिगु कब्जाय् कयागु दाबी याःगु दु । रुसया रक्षा मन्त्रालयं थुकिया पुष्टि याःगु दु । रुसं दाबीया कथं थ्व शहरय् नियन्त्रणय् वल धाःस रुसं युक्रेनया लःया प्रमुख स्रोतयात नियन्त्रणय् कायेफइ ।

संयुक्त राष्ट्र संघं बिउगु जानकारीकथं युक्रेनय् आःतक ५२६ म्ह मनू सीधुंकूगु दु । राष्ट्र संघ बिउगु जानकारीकथं १३ म्ह मस्तसहित १३६ म्ह सर्वसाधारण सीगु दुसा प्यसलं मल्याक घाःपाः जूगु दु । राष्ट्र संघं पूर्वी युक्रेनया डोनत्स्क व लुहान्स्कय् जक २५३ म्ह मनू सीगु धाःगु दु ।

सम्बन्धित बुखँ

LEAVE YOUR COMMENTS