न्यय्दँ दुने स्वब्व निब्व जीवजन्तुया विनाश

एजेन्सी- वातावरण सम्बन्धी ज्या याना वयाच्वंगु विश्व वन्यजन्तु कोष (डब्ल्यूडब्ल्यूएफं) मनूतय्सं थ्वयां न्ह्यः गुबलें मयाःकथं प्रकृतिया विनाश यानाच्वंगु धासें ख्याच्वः बिउगु दु। कोषय् न्हूगु प्रतिवेदनय् प्रकृतिया दोहन न्हापा गुबलें मजूगु दरय् जुयाच्वंगु खँ न्ह्यथनातःगु दु ।

विश्वन्यंकं थीथी जंगलय् दुपिं वन्यजन्तु, समुद्रय् दुपिं जलप्राणी व घाँसय् च्वनीपिं हजारौं हराज जीवया अध्ययन यानाः थ्व प्रतिवेदन पिकाःगु खः । प्रतिवेदन कथं वंगु ५० दँया दुने झंगःपंछि, न्या, स्तनधारी, उभयचर व घुसुघुसु न्ह्याःवनीपिं जनवारत विश्वब्यापी रुपं स्वब्वय् निब्व म्हो जूवनेधुंकूगु दु । संरक्षण सम्बन्धी वैज्ञानिकतय्सं सन् १९७० लिपा विश्वन्यंकं थज्याःगु जीवतय् ल्याः औसतय् ६८ प्रतिशत तक म्हो जूगु खँ धाःगु दु ।

वैज्ञानिकतय्सं थुकियात विध्वंसकारी धकाः ब्याख्या याःगु दु। प्रतिवेदन च्वयेगुलि सहभागीपिंसं माक्व स्वयां अप्वः न्या स्यायेगु, जंगलय् मिं नइगु व वन्यजन्तु बसोबास याइगु क्षेत्रया विनास जूगुलिं कारणं जीवतय् ल्याः म्हो जुयावंगु व थ्व तसकं ग्यानापुगु खँ धाःगु दु। तर प्रकृति विनास म्हो यायेत याना वयाच्वंगु कुतलय् तत्काल थप पलाः न्ह्याकेगु खःसां अझं लिमबानीगु खँ नं उमिसं धाःगु दु ।

प्रकृतिया विनाश पनेगु निंतिं झीगु नयेत्वनेगु बानी व झीसं उत्पादन यायेगु नसाज्वलं नं प्रभाव लाकी । जंगलया विनाश यायेगु, समुद्रय् अत्यधिक रुपं न्या स्यायेगु व जंगली जीवतय्त सखाप यायेगु ज्यां पृथ्वीइ थुकिया लिच्वः खनेदयेधुंकूगु खँ वैज्ञानिकतय्सं धाःगु दु। तर तत्काल थुकिया विरुद्ध पलाः न्ह्याकल धाःसा थुकिया प्रवाह अःखः जुइफु धयागु प्रमाण नं दुगु खँ उमिसं धाःगु दु ।

सम्बन्धित बुखँ

LEAVE YOUR COMMENTS