ब्रेक्जिट मस्यौदा बेलायती मन्त्रिपरिषद्पाखें अनुमोदन

बेलायतया मन्त्रिपरिषदं युरापेली संघ त्वःतेगु बेक्जिट सम्झौता सम्बन्धी प्रधानमन्त्री टेरेजा मेया प्रस्ताव अनुमोदन याःगु दु । प्रधानमन्त्री मे नं युरोपेली संघपाखें बेलायत पिहां वयेगु सम्बन्धी विस्तृत शर्तयात कयाः संघलिसे जूगु मस्यौदा सम्झौतायात थःगु मन्त्रिपरिषदं अनुमोदन याःगुख ँ धयादीगु दु ।

मन्त्रिपरिषद्य् ताःहाकः सहलह लिपा अनुमोदन जूगु खँ वय्कलं धयादीगु दु ।‘जिमिगु न्ह्यःने यक्व हे मछिंगु विकल्पत दुगु खः । थ्व आःतक चूलाःगु मध्ये दकलय् उत्तम विकल्प खः । थ्व बेलायतया राष्ट्रिय स्वार्थ कथं दु’ वय्कलं धयादीगु दु । मन्त्रिपरिषद् गुम्ह मन्त्रीतय्सं उगु प्रस्तावया विरोधय् न्ववाःगु खँ बिबिसीं धाःगु दु ।

विपक्षी लेबर दलया नेता जेरेमी कोर्बीनं उगु सम्झौता बेलायतया राष्ट्रिय स्वार्थ अनुकुल जू थें थःत मताःगु खँ धाःगु दु । थ्व प्रस्तावया विपक्षय् मत बीगु कि मबिइगु बारे लेबर दलं निर्णय याइगु जूगु दु । सत्तारुढ कन्जरभेटिभ पार्टी दुने नं थ्व प्रस्ताव विरुद्ध तच्वःगु सः थ्वयाच्वंगु दु ।

मेखे ताःई न्ह्यव निसें अन्योलय् लानाच्वंगु थ्व सम्झौतायात कयाः बेलायती सरकारं याःगु निर्णययात कयाः युरोपेली नेतातय्सं धाःसा लसकुस याःगु दु । युरोपेली युनियनया बे्रक्जिटसम्बन्धी मू वार्ताकार मिसेल बार्नियरं बेलायतया निर्णय स्वाभाविक रुपं बे्रक्जिटया कार्यान्वयनया निंतिं महत्वपूर्ण जूगु खँ धाःगु दु । वय्कलं निगुलिं पक्षं निर्णायक प्रगति चूलाकूगु खँ धयादीगु दु ।

सम्बन्धित बुखँ

LEAVE YOUR COMMENTS