सिनावात्राया शाही पदवी लितकाल

थाइल्यान्डया जुजु माहा वाजिरालोङकोर्नं पुलांम्ह प्रधानमन्त्री थाक्सिन सिनावात्रायात बियातःगु शाही मनपदवी लित कयाबिज्याःगु जूगु दु । भ्रष्टाचारया द्वपं लानाच्वंगुलिं सिनावात्रायात बियातःगु मानपदवी लित कायेमाःगु खँ राजदरवार ज्याकुथिइ पितबिउगु वक्तव्यय् धयातःगु दु । वक्तव्यय् धयातःगु दु, ‘जुजु माहा वाजिरालोङर्कोर्नं पुलांम्ह प्रधानमन्त्री थाक्सिन सिनावात्रायात लःल्हानादीगु शाही मानपदवी लित कायेगु शाही निर्देशन जारी याःगु दु ।’

थाइल्यान्डय् संसदीय निर्वाचन क्वचाःगु छवाः लिपा हे जुजु थाक्सिनं थ्व मानपदवी लितकाःगु खः । थाक्सिन प्रधानमन्त्री जुयाच्वंगु इलय् सन् २००८ य् भ्रष्टाचारया द्वपं लायेवं वय्कःयात सेनां सत्ताच्यूत याःगु खः । उबलय् निसें वय्कः स्वेच्छिक निर्वासनय् च्वना वयाच्वनादीगु दु । भ्रष्टाचारया द्वपनय् वय्कःयात अदालतं म्होतिं नं निदँया जेल सजाय न्यंकातःगु दुसा वय्कलं धाःसा थःत बिउगु द्वपं अस्वीकार याना वयाच्वंगु दु ।

थाइल्यान्डय् वंगु आइतवाः जूगु निर्वाचनय् धाःसा थाक्सिनया समर्थन दुगु फिउ थाइ पार्टीं दकलय् अप्वः सिट हःगु दु । कूल ५०० सिटया निंतिं जूगु चुनावय् फिउ थाइ पार्टीं १३७ सिट त्याकूगु दुसया थ्वया निकटम प्रतिद्वन्द्वी सेनाया समर्थन दुगु पालङ प्रथा रथं ११८ सिट जक त्याकल ।