विश्वय् छन्हुं हे २ लाख ६० हजार संक्रमित
एजेन्सी – विश्वन्यंकं छन्हुं हे कोरोना भाइरस संक्रमित जूपिनि ल्याखय् न्हूगु कीर्तिमान कायम जूगु दु। विश्व स्वास्थ्य संगठनया कथं म्हिगः २४ घन्टाया दुने विश्वन्यंकं २ लाख ६० हजारम्हेसित संक्रमण जूगु दु। थ्व ल्याः कोरोना महामारी
सुरु जुइधुंकाः छन्हुं हे संक्रमित जूपिनि ल्याखय् आःतकया दकलय् अप्वः खः ।
संक्रमणया दकलय् अप्वः घटना अमेरिका, ब्राजिल भारत व दक्षिण अफ्रिकाय् खनेदुगु दु। डब्ल्यूएचओया कथं अमेरिकाय् जक म्हिगः २४ घन्टा दुने ७१ हजार ४८४ म्हेसिके संक्रमण खनेदुगु खःसा ब्राजिलय् ४५हजार ४०३ म्हेसिके संक्रमण खनेदुगु खः, अथेहे भारतय् ३४ हजार ८८४ म्हेसिके संक्रमण खनेदुगु खः ।
डब्ल्यूएचओया कथं न्हापांखुसी संक्रमिततय् ल्याः छन्हुं हे निगूत्या लाख स्वयां अप्वः जूगु खः । अथेहे थ्व २४ घन्टाया दुने कोरोनां सीपिनि ल्याः नं ७ हजार ३६० म्ह थ्यंगु दु। थ्व ल्यां नं वंगु मे१० लिपा दकलय् अप्वः खः । जोन हप्किन्स विश्वविद्यालयया कथं म्हिगः तक विश्वन्यंकं कोरोना संक्रमित जूपिनि ल्याः १ करोड ४२ लाखं अप्वः थ्यनेधुंकूगु दुसा सीपिनि ल्याः ६ लाख १हजार २१३ म्ह थ्यंगु दु ।
थौंकन्हय् अमेरिकाय् मुख्यत फ्लोरिडा, टेक्सस व एरिजोनाय् महामारी न्यनाच्वंगु दु। फ्लोरिडा थौंकन्हय् अमेरिकाय् महामारीया केन्द्र जुयाच्वंगु दु। शनिवाः जक थन ९० म्हेसिया मृत्यु जूगु खःसा झिद्वलं मल्याक मनूतय्के संक्रमण खनेदुगु खः । फ्लोरिडा लिसें टेक्कस, एरिजोना राज्यतय्सं लकडाउन यायेत अस्वीकार याना वयाच्वंगु दु। आः थुपिं राज्यय् मास्क
तयेगु धाःसा अनिवार्य याःगु दु। वंगु छुं वालं निसें अमेरिकाय् मास्क तयेगु खँय् हे राजनीति जुया वयाच्वंगु दु। राष्ट्रपति
डोनाल्ड ट्रम्पं हे मास्क तयेगु अनिवार्य यायेत थःम्हं निर्देशन बीमखु धया वयाच्वंगु दु। तर अमेरिकाया संक्रामक रोग विशेषज्ञ व स्वास्थ्य प्रमुख डा. फाउचीं राजनेतातय्त गुलि फु उलि मनूतय्त मास्क तयेत निर्देशन बीत इनाप यानाच्वंगु दु ।
मेखे भारतय् अझ नं कोरोना संक्रमण ‘पीक’ ई वये ल्यं दनि धाःगु दु। भारत थौंकन्हय् दकलय् अप्वः संक्रमण जूगु देय्या धलय् स्वंगूगु थासय् लाः वयेधुंकूगु दु। वैज्ञानिकतय्सं भारतय् अझं अप्वः संक्रमण न्यनीगु खँ धयाच्वंगु दु। भारतया महाराष्ट्र राज्यय् जक संक्रमिततय् ल्याः स्वंगू लाखं अप्वयेधुंकूगु दु। थनया मुम्बई शहरय् जक छगू लाखं मल्याक मनूतय्के संक्रमण खनेदयेधुंकूगु दु ।
मेखे छुं ई न्ह्यः कोरोनां बांमलाक आक्रान्त जुयाच्वंगु पश्चिमी युरोपय् आः बुलुहुं बजाः चालेगु सुरु जुया वःगु दु। थुपिं देय्तय्सं आः सीमा चायेकेगु बारे नं बिचाः यानाच्वंगु दु। तर छुं छुं थासय् धाःसा हाकनंसंक्रमण अप्रत्यासित रुपं थहां वनाच्वंगु दु ।
स्पनेया उत्तरपूर्वी लागा क्याटलोनियाय् छन्हुं हे द्वःछिं मल्याक संक्रमण खनेदुगु दु। बार्सिलोना, ला नोगएरा व एल सेग्रियाया ४० लाख मनूतय्त म्होतिं नं १५ न्हु तक सेल्फ आइसोलेसनय् च्वनेत धाःगु दु। थन हाकनं छक्वः कडा प्रतिबन्ध सुरु जूगु दु। थ्वहे दथुइ बेलायती प्रधानमन्त्री बोरिस जोन्सनं चिकुलाया मौसमलय् हाकनं कोरोनाया लहर वल धाःसा हाकनं छक्वः देशय् लकडाउन यायेत थः तयार मदु धयादीगु दु। वय्कलं थुकिया निंतिं चिचिधंगु उपाय नालेगु बारे बिचाः यानाच्वनागु खँ धयादीगु दु ।
LEAVE YOUR COMMENTS