ने. सं. ११४३ चौलाथ्व तृतीया -

ल्हाः मदयां छु जुल ?

झीगु समाजय् आतक नं कां, खू, धुसि वा शारीरिक रुपं अपांग जूपिंत स्वयेगु दृष्टिकोण बांलाः मजूगु जक मखु, इमित याइगु व्यवहार नं बांलाः मजू । अथे खःसां नं इमिसं थःपिंसं नं समाजया निंतिं छुं याये फु, यानाः क्यने फु धकाः थःत उदाहरणया रुपय् प्रस्तुत यानाच्वंगु झीसं आपालं खंकेफु ।

शारीरिक रुपं असक्त जूसां प्याखं हुलेगु, चित्र च्वयेगु, थीथीकथंया क्रियाकलाप यानाच्वंगु झीसं स्वया च्वनागु हे खः । धाइ शारीरिक अपांग जूसां दृढ इच्छाशक्ति दत धाःसा सगरमाथा नं गये फइ । थुकिया छगू ज्वलन्त उदाहरण खः अमेरिकाया जेसिका कोक्स । जेसिकाया जन्मकालंनिसें हे निपां ल्हाः मदु ।

उकिं वयागु दिन चर्या गुलि असहज धइगु खँ झीसं अनुमान यायेफु । तर वयाके दुगु हिम्मत व इच्छाशक्ति धाःसा धाथें सुं सबलांग स्वयां म्हो मजू । अमेरिकाया एरिजोना निवासी ३० दँ दयेधुंकूम्ह जेसिका छम्ह कुशल विमान चालकलिसें पौडीवाज, तेक्वान्दो कासामि जक मखु, ‘मोटिभेसन स्पीकर’ नं खः । अझ तेक्वान्दोय् ला वं ‘ब्ल्याक बेल्ट’ तकं प्राप्त यायेधुंकूगु दु ।

जन्मंनिसें हे निपां ल्हाः मदुसां थःगु दृढ इच्छाशक्ति पूरा यायेत सशक्त रुपं न्ह्यचिलाच्वंम्ह जेसिकां सन् २००५ य् ‘फेडरल एभिएसन एडमिनिस्ट्रेसन’य् पाइलट प्रशिक्षण कयाः सन् २००८ य् अनुमति पत्र तकं प्राप्त याःगु खः । जेसिकां चिग्वःगु जहाज उडान यायेगु अनुमति काःगु खः ।

जेसिकायात जीवनया हरेक मोडय् वयात प्रेरणा बिया वयाच्वंम्ह वया मां खः । मामं बिउगु प्रेरणाया कारणं हे सफलताया त्वाथः गया वनाच्वंम्ह जेसिकां थः थें हे अपांग जूपिंत अभिप्रेरित यायेगु ल्याखं मोटिभेसन कक्षाय् सहभागि जुयाच्वंगु दु । थ्व झ्वलय् जेसिकां आतकया दुने नीगू स्वयां अप्वः देशय् मोटिभेसनया कक्षाय् सहभागि जुयाः प्रशिक्षण तकं बी धुंकूगु दु ।