इटलीइ डेढ करोड मनूत क्वारेन्टाइनय्

एजेन्सी – कोरोना भाइरसया संक्रमण तच्वया वयेवं इटलीया लोम्बार्डीलिसे मेमेगु क्षेत्रया थ्यंमथ्यं छगू करोड ५० लाख मनूतय्त अनिवार्य क्वारेन्टाइनय् तःगु दु। थुमित वइगु अप्रिलया सुरुइ तक अलग हे तयाः निगरानी यायेगु खँ धाःगु दु। इटलीइ लागू याःगु थ्व क्वारेन्टाइन वित्तीय केन्द्र धयातःगु मिलान लिसें भेनिसया पर्यटकीय स्थलय् नं वइगु अप्रिल ३ तक लागु जुइगु खँ धाःगु दु ।

न्हूगु संक्रमण नियन्त्रण यायेगु निंतिं आः व्यायामशाला, पौडीपोखरी, संग्रहालय, स्की रिजोर्ट आदियात बन्द याःगु दु। युरोपेली देय् मध्ये इटलीइ दकलय् अप्वः कोरोना भाइरसया संक्रमण जुयाच्वंगु दु। शनिवाः नं थन संक्रमिततय् ल्याः व्यापक रुपं थहां वंगु खः । कोभिड १९ धाइगु थ्व संक्रमणं इटलीइ २३० म्हेसिया ज्यान वनेधुंकूगु दुसा शनिवाः तकया दुने संक्रमित जूपिनि ल्याः १२०० थप जुयाः ५८८३ थ्यंगु दु ।

सरकारं हःगु न्हूगु व्यवस्था कथं १ करोड मनूत दुगु उत्तर भेगय् लाःगु लोम्बार्डी व वित्तीय क्षेत्र मिलानय् अत्यावश्यक अवस्थाय् बाहेक मेगु इलय्
फुक्कं बन्द जुइ । भेनिस लिसें मेगु १४ गू प्रान्तय् नं थ्व प्रावधान लागु जुइ । थुकिं छगू लाख ६० लाख मनूत प्रभावित जुइगु खँ धाःगु दु ।