ने. सं. ११४३ चौलाथ्व पारू -

अमेरिकाय् ७० दँ लिपा मिसायात मृत्युदण्ड

एजेन्सी – अमेरिकाय् छम्ह मिसायात मृत्युदण्ड बीत्यंगु दु । अमेरिकाय् सुं नं मिसायात मृत्युदण्ड बीत्यंगु थ्व थ्यंमथ्यं ७० दँ लिपा न्हापांखुसी खः । थ्वयां न्ह्यः सन् १९५३ य् अमेरिकाया मिसोरीइ बनी हेडी नांया मिसायात मृत्युदण्ड बिउगु खः । वइगु डिसेम्बर ८ तारिख लिसा मन्टगमरी नांया मिसायात इन्डियाना प्रान्तय् प्राणघातक सुइ बिइत्यंगु खः ।

लिसा मन्टगमरीं सन् २००४य् मिसोरीइ छम्ह प्वाथय् दुम्ह मिसायात स्यानाः वयाः प्वाः फायाः मचायात अपहरण यानायंकूगु खः । अमेरिकी महान्यायाधिवक्ता विलियम बारं उम्ह मिसां याःगु अपराध जघन्य अपराध खः धकाः धाःगु दु । ट्रम्प प्रशासनं वंगु दँय् हाकनं मृत्युदण्ड सुरु यायेगु खँ धाःगु खः ।

अमेरिकाया न्याय मन्त्रालयं बिउगु प्रेस विज्ञप्ति कथं सन् २००४या डिसेम्बरय् मन्टगमरी खिचाया मचा न्यायेगु धकाः केन्सासं निसें वयाः मिसोरीइ च्वनाच्वंम्ह बबी जो स्टिनेटया छेँय् थ्यंकः वःगु खः । छेँय् थ्यनेवं मन्टगमरीं च्यालाया प्वाथय् दुम्ह स्टिनेटयात आक्रमण यानाः बेहास यानाबिल, अले भुतूक्वथाय् छ्यली चक्कु हयाः स्टिनेटया प्वाः फायाः बिल । थथे प्वाः फायाच्वंबलय् स्टिनेटया होस वल । होस वयेधुंकाः प्रतिकार यायेगु झ्वलय् स्टिनेटया ज्यान वंगु खः । थ्व लिप मन्टगमरीं प्वाथय् च्वंम्ह मचा लिकया यंकाः थःम्ह हे मचा धकाः धयाजूगु खः ।

सन् २००७ य् न्यायाधीतय् जुरीं वयात अपहरण व हत्याया दोषी ठहर यासें सर्वसम्मतं मृत्युदण्डया सजाय न्यंकूगु खः । वया वकिलतय्सं धाःसा मन्टगमरीं थः मचाबलय् हे यक्व ल्हाः नयेमाःगुलिं दिमागय् असर लानाच्वंगु व व मानसिक ल्वगि जूगुलिं मृत्युदण्ड बीमजिउगु तर्क तयाच्वंगु खः ।