थनिंनिसें विश्वकप सुरु

विश्वकप २०१८ थनिंनिसें सुरु जुइत्यंगु दु । थौं बहनी रुसया लुझनिकी रंगशालाय् विश्वकपया उलेज्या याइ । उलेज्या लिपा न्हापांगु कासा रुस व साउदी अरब दथुइ थ्व हे रंगशालाय् नेपाली ई कथ बहनीसिया ८ः४५ बजे सुरु जुइ । उलेज्या समारोहय् ८० हजार दर्शक रंगशालाय् थ्यनीगु खँ धाःगु दु ।

उद्घाटन समारोह बहनीसिया ८ बजे निसें सुरु जुइ । आधा घण्टाया उलेज्या समारोहय् बेलायती गायिका रोबी विलियम्स लिसें रसियाया गायिका सोप्रानो अइडा गारिफुलिनां थःगु प्रस्तुति बी । उलेज्या समारोहय् थुगुसीया विश्वकपय् म्हितीपिं स्वीनिगुलिं देय्या प्रतिनिधिपिं थ्यनी ।

विश्वकप उलेज्या लिपा न्हापांगु कासा अर्जेन्टिनी रेफ्री नेस्टर पिटनां म्हितकीगु जूगु दु । थ्व हे कासा निंतिं विश्वकपय् न्हापांखुसी भिडियो असिस्टेन्ट रेफ्री (भीआर) प्रविधि नं सुरु जुइ । भीआर प्रविधिइ इटालीया मसिमिलानो इटारी मू रेफ्री जुइ ।

स्वयेबहःम्ह कासामि

मोहम्मद अली साहलावी
फरवार्ड, साउदी अरब

झिंनिदँ लिपा सउदी अरबं थुगुसी विश्वकप म्हितेत्यंगु दु । साउदीयात विश्वकपय् थ्यंकेत मोहम्मद अल साहलावीया भूमिका महत्वपूर्ण जुल । वं थःगु देय्यात विश्वकपय् थ्यंकेगु निंतिं छनोट चरणय् महत्वपूर्ण झिंखुगू गोल याःगु खः ।

रर मदयेक टिम पूवनी मखु, अले साउदीया स्कोरर खः – मोहम्मद अल साहलावी । वं छक्वः धाःगु खः, ‘जितः विश्वकपय् गोल याये मास्ति वः ।’ मोहम्मदया विश्वकप यात्रा ला थनिंनिसें सुरु जुल । आः वयागु गोल यायेगु इच्छा पूवनी लाकि पूवनी मखु, व जक स्वये ल्यं दनि ।