लुँया तिसा लुटे याइपिं पुचः ज्वन

येँ (नेपालभाषा टाइम्स) – येँ व काभ्रेय् श्रृखलाबद्ध रुपय् लुटपाट याना वयाच्वंगु कर्मा पुचःयात प्रहरीं ज्वनाः म्हिगः सार्वजनिक याःगु दु । लुटपाटय् दुथ्याःपिं मध्ये पुचःया मू नाइके कर्मा तामाङयात म्हीग बहनी प्रहरीं गोलीं कयेकाः ज्वंगु खः । प्रहरीया एसएसपी दिलिप घिमिरेया कथं थुगु पुचः लिपांगु प्यंगू लुटपाट घटनाय् दुथ्याःपिं खः ।

थुगु पुचलं वंगु साउन ७ गते धापासी हाइटय् न्यासि वनाच्वंम्ह ज्याथिया छतोला लुँ लुटपाट याःगु खः । उकथं हे असार १५ गते येँ मनपाय–३२ वडाया नरेफाँटय् ३ तोला लुँ लुटपाट याःगु खःसा उगु हे न्हिकुन्हु धौख्यलय् १ तोला २० लाल लुँ लुटे याःगु खः ।

अथेहे असार १३ गते सुथय् ४ बजे शान्तिनगरय् तरकारी न्याः वनाच्वंम्ह छम्ह मिसायात लछारपछार यानाः २ तोला लुँ लुटे याःगु खः । लुटपाटय् दुथ्याःपिं प्रतिमान गोले, पासाङ घिसिङ, आले गुरुङ व मनोज तामाङयात प्रहरीं नं ज्वंगु खः । मनोज तामाङ लुटे यानाहःगु लुँ न्याइम्ह धौख्यःया लुँ पसल्या जूगु जानकारी नं प्रहरीं बिउगु दु ।

थुगु पुचलं लँय् वनाच्वंपिंत लँपु न्यनाः अलमलय् यानाः लुटपाट यायेगु यानाच्वंगु खः । लुटपाटया निंतिं पुचलं खुयाहःगु मोटरसाइकल छ््यलेगु याइगु खः । खुयाहःगु मोटरसाइकल नं गामय् यंकाः मीगु यानाच्वंगु खँ प्रहरीं धाःगु दु ।