ने. सं. ११४६ दिल्लागा पञ्चमी -

सुस्ताय् एसएसबीं बाँध थुनाबिल

येँ (नेपालभाषा टाइम्स) – नवलपरासीया सुस्ताय् भारतीय सशस्त्र सीमा बल (एसएसबीं) नेपाःया भूमिइ दुहां वयाः अन दयेकाच्वंगु अस्थायी बाँध थुनाबीवं विवाद जूगु दु । सुस्ता बचाउ अभियान नवलपरासीया प्रवक्ता रविन्द्र जैसवालं एसएसबीया जवानत वयाः बाँध थुनाबिउगु खँ धाःगु दु ।

स्थानीयवासी वा वइगु इलय् खुसिबाः पनेगु निंतिं वंगु शनिवाः अस्थायी बाँध दयेकूगु खःसा भारतीय पक्षं म्हिगः उगु बाँध थुनाबिउगु खः । नेपाली पक्षं वा वइगु इलय् खुसिबाः पनेत अस्थायी रुपं बाँध दयेकूगु इलय् सुरुं निसें हे भारतीय पक्षं पंगःथना वयाच्वंगु खः । थ्वहे झ्वलय् म्हिगः एसएसबीया जवानत सादा वसतय् हतियारसहित नेपाःया भूमिइ दुहां वयाः बाँध थुनाबिउगु खः ।

भारतीय सुरक्षाकर्मीं सुस्ता गाउँपालिका–५ या थारु त्वालय् दयेका–च्वंगु बाँध थुनाबिउगु खः । नेपाःपाखे दयेकाच्वंगु बाँध थुनाबीवं स्थानीयवासीं प्रतिवाद याःगु खः ।

नवलपरासीया प्रमुख जिल्ला अधिकारी दिपकराज नेपालं वा वइगु इलय् बाः वइगु लः पनेत तयातःगु अस्थायी बाँधयात कयाः विवाद जूगु व विवाद साम्य यायेत सशस्त्र प्रहरी बल परिचालन यानागु खँ धयादीगु दु । वय्कःया कथं अवस्था म्हिगः हे सामान्य जुइधुंकूगु दु ।

थ्व स्वयां न्ह्यः वंगु असारय् नं भारतीय सुरक्षाकर्मी सुस्ता क्षेत्रय् दुहां वयाः बाँध दयेकेगु ज्या दिकेत दबाब बिउगु खः । सुस्ता नेपाल व भारत दथुइ ताः इलंनिसें विवाद जुयाच्वंगु सीमा क्षेत्र खः । भारतीय सुरक्षाकर्मी नेपाः व भारत सीमा क्षेत्रं ३ सय मिटर तक नेपाःया भूमिइ दुहांवःगु खः ।