पेनाल्टि सुटआउटय् रसिया पराजित

एजेन्सी -पेनाल्टि शुटआउटय् थ्व पालय् भाग्यं साथ मबिइवं ग्वसाः देय् रसिया विश्वकपं पिने लाःगु दु । रसियायात क्वार्टरफाइनल तक थ्यंकेगु निंतिं स्पेन विरुद्धया कासाय् नायक जूम्ह रसियाया गोलकिपर आकिनोफिवं क्रोसिया विरुद्धया पेनाल्टि सुटआउटय् नं छगू पेनाल्टि बचे याःगु खःसां रसियाया मारिया फर्नान्डेजं पोस्ट पिने बल थ्वायेवं रसियां पराजय फयेमाल ।

नियमित ९० मिनेटया इलय् छगू छगू गोलया बराबरी जुइवं थप याःगु ३०मिनेटय् नं निगुलिं टिमं छगू छगू गोल यायेवं कासा पेनाल्टिइ वंगु खः ।
रसिया फेडर सोमोलोभं थ्वाःगु न्हापांगु पेनाल्टि क्रोसियाया डानिजेल सुभासिकं पनाबिउगु खः । थ्व धुंकाः रसियाया गोलकिपरं माटियो कोभाकिकया बल पनाबिउगु खः । तर फर्नान्डेजं थ्वाःगु बल पोस्टं पिहां वनेवं इभान राकिटिकं अन्तिम बलय् गोल यासें क्रोसियायात सन् १९९८ लिपा न्हापांखुसी सेमिफाइनलय् यंकूगु खः ।

क्रोसियां आः बुधवाः इंग्ल्यान्डलिसे सेमिफाइनल कासा म्हिती ।