नीन्यासलं मल्याक मस्तय् जिम्न्यास्टिक ब्वज्या

येँ – नीन्यासलं मल्याक स्कुलया विद्यार्थी, शिक्षक व स्वयंसेवीतय्सं शनिवाः येँया न्हूसतकय् तःजिगु म्युजिक जिम्न्यास्टिक ब्वज्या याःगु दु । सक्रिय जुयाच्वने, स्वस्थ जुयाच्वने, स्वतन्त्र जुयाच्वने व ल्याय्म्ह महसुस यानाच्वने धयागु नारा बियाः ‘जिम्न्यास्टिक फर अल अभिवृद्धि तथा समन्वय क्लबं’ सकसियां निंतिं जिम्न्यास्टिक परियोजना अन्तर्गत निक्वःगुखुसी थुकथं सतकय् तःजिक म्युजिकल जिम्न्यास्टिक ब्वज्या याःगु खः ।

ज्याझ्वलय् जर्मन व जापानं वःपिं स्वयंसेवकपिंसं म्युजिकल जिम्न्यास्टिकया थीथी विधा न्ह्यब्वःगु खः । थुगु ज्याझ्वःया निंतिं जर्मनीया रेहनहेस्च्र टर्नरबन्ड जिएफएया विशेषज्ञ छुं ई न्ह्यव निसें स्कुलया विद्यार्थीपिंत म्युजिकल जिम्न्यास्टिकया तालिम बिया वयाच्वंगु खः ।

ज्याझ्वलय् येँ महानगरपालिकाया मेयर विद्यासुन्दर शाक्य मूपाहाँ कथं झायादीगु खः । ज्याझ्वलय् न्ववानादिसें वय्कलं थः स्वस्थ जूसां जक देय्, समाज स्वस्थ यायेफइ, समृद्ध यायेफइ धयादिसें महानगरवासीयात स्वस्थ यानातयेगु निंतिं थज्याःगु ज्याझ्वः आवश्यक जू धयादिल ।

जिम्न्यास्टिक फर अल अभिवृद्धि तथा समन्वय क्लबया नायः ज्ञानकाजी महर्जनया सभापतित्वय् जूगु ज्याझ्वलय् नेपाल जिम्न्यास्टिक संघया नायः धु्रवबहादुर प्रधानं विदेशी सहभागीपिंत लुमन्ति चिं इनादीगु खः । ज्याझ्वलय् कार्यक्रम संयोजक प्रकाश श्रेष्ठं लसकुस यानादीगु खः ।