पेरुइ पर्यटकीय विमान दुर्घटना, १३ म्ह सित

एजेन्सी – पेरुइ शनिवाः छगः चिग्वःगु विमान दुर्घटना जूगु दु । दुर्घटनाय् लानाः विमानय् दुपिं झिंस्वम्ह मनू सीगु स्थानीय सञ्चार माध्यमतय्सं जानकारी बिउगु दु । विमानय् निम्ह चालक दलसहित झिंस्वम्ह दुगु खः । विश्वय् नांजाःगु नाज्का लाइन्सया च्वय् ब्वयाच्वंगु इलय् थ्व विमान दुर्घटना जूगु खः ।

पेरुया सरकारी समाचार माध्यमं बिउगु जानकारी कथं सीपिं मध्ये निम्ह जर्मन, निम्ह स्पेनी व न्हय्म्ह इटालियन पर्यटक खः । दुर्घटना छु जुयाः जूगु धयागु सीमदुनि । प्रहरीं थप अनुसन्धान जुयाच्वंगु धाःगु दु । पस्को विमानस्थलं ब्वयाः छुं ई लिपा हे विमान दुर्घटना जूगु खः । स्थानीय ईकथं न्हिने सिया १ ताः इलय् नाज्का लाइन्सय् एयर लाइन्स एरोडियनया विमान दुर्घटना जूगु अधिकारीतय्सं धाःगु दु । थ्व कम्पनीं वंगु १४ दँ निसें नाज्का लाइन्सया च्वं दृश्यावलोकन याकेगु ज्या यानाच्वंगु खः । नाज्का लाइन्स पेरुया प्राचीन बासिन्दातय्सं मरुभुभियात म्हुयाः दयेकातःगु विशाल भू-चित्रया पुचः खः । जनावर आकृतिया भू-चित्र विमान वा विशेष टावरं जक बालांक खने दइ ।