लिभरपुल त्यात, चेल्सी व बार्सिलोना बराबरीइ
च्याम्पियन्स लिग अन्तर्गत म्हिगः जूगु कासाय् डिफेन्डिङ च्याम्पियन लिभरपुलं विजय चूलाकूगु दुसा प्रिमियरशीपया मेगु टिम चेल्सी धाःसा स्वंगू गोलं लिउने लाःसां बराबरी यायेत ताःलाःगु दु । मेखे स्पेनया महारथी क्लब बार्सिलोना धाःसा गोल यायेमफयेवं बराबरीइ चित्त बुझे यायेमाःगु दु ।
अथेहे जर्मनीया बोरुसिया डर्टमन्डं निगू गोलं लिउने लाःसां पुनर्आगमन यानाः विजय चूलाकूगु दु ।बेल्जियन क्लब जेन्कयात २–१ गोलं बुकूगु डिफेन्डिङ च्याम्पियन लिभरपुल थ्व विजय लिपा नकआउट चरणया लिक्क थ्यंगु दु । समूह चरणय् निगू कासा ल्यं दनिगु इलय् लिभरपुलया प्यंगू कासा म्हिताः ९ अंकं दु ।
म्हिगः चान्हय् जूगु कासाय् लिभरपुलया निंतिं जर्जिन्हो विज्नल्डम व अक्सलेड चेम्वरलेनं छगू छगू ोल याःगु खःसा जेन्कया निंतिं एमवीवाना समतां छगू गोल याःगु खः । लिभरपुलं थ्व विजय थःगु घरेलु मैदानय् अपराजित यात्रायात २४ गू कासा तक थ्यंकूगु दु । समूह ‘ई’या लिभरपुल लिसें दुगु मेगु निगू टिम नेपाली व साल्जवर्ग दथुया कासा धाःसा १–१ गोलया बरबरीइ क्वचाःगु दु ।
नेपोली ८ अंक कयाः निगूगु थासय् दु । मेखे स्टामफोर्ड बिज्रय् चेल्सी व आयाक्स दथुइ जूगु कासा च्यागू गोल लिपा बराबरीइ क्वचाःगु दु । तसकं तनावपूर्ण थ्व कासाय् निगू ह्याउँगु कार्ड नकूगु खः । चेल्सीं स्वंगू गोलं लिउने लायेधुंकाः नं कासा बराबरीइ हःगु खः । कासाया निगूगु मिनेटय् हे टम्मी अब्राहमं आत्मघाती गोल यायेवं आयाक्सं अग्रता काःगु खः ।
थ्व लिपा चेल्सीयात पेनाल्टिया ह्वःताः वलसा थुकी जोयल जर्गिन्हों गोल यासें कासा बराबरीइ हःगु खः ।आयाक्सया निंति कासाया २० औं मिनेटय् क्वीन्सी प्रोमिसं गोल यातसा कासाया ३५ औं मिनेटय् हाकनं चेल्सीया गोलरक्षक किपा अरिजाबालगां आत्मघाती गोल यानाबिल । थ्व लिपा चेल्सी न्हापांगु हाफय् हे निगू गोलं लिउने लात ।
कासाया ५५ औं मिनेटय् डोनी भान डि बिकं थप छगू गोल यानाबीवं आयाक्स ४–१ गोलया स्थितिइ न्ह्यःने लायेधुंकूगु खः । चेल्सीं कासाय् पुनर्आगमन यायेगु झ्वलय् ६३ औं मिनेटय् सेजरं छगू गोल यात । थ्व लिपा निगू मिनेटया अन्तरय् आयाक्सया निम्ह कासामि निगू ह्याउँगु कार्ड नयाः मैदानं पिहां वने मालेवं चेल्सीयात कासाय् लिहां वयेत अःपुल ।
कासाया ६८ आं मिनेटय् डोल ब्लिन्डयात चेल्सीया अब्राहमयात फल याःगुलिं व ६९ औं मिनेटय् जोयल भेल्टम्यानं ल्हातं बल पनेवं ह्याउँगु कार्ड नकूगु खः । आयाक्सय् गुम्ह कासामिइ सीमित जुइवं चेल्सीं उकिया लबः कासें ७१ औं मिनेटय् जर्गिन्सं पेनाल्टीइ गोल यातसा ७४ औं मिनेटय् रिस जेम्सं बराबरी गोल याःगु खः ।
थ्व लिपा ७८ औं मिनेट कप्तान सेजरं गोल याःगु खःसां थुकियात भिआरए पाखें मान्यता मबिइवं चेल्सीं बराबरीइ हे चित्त बुझे यायेमाःगु खः ।
बराबरीइ लिपा समूह एचय् ७ अंक कयाः आयाक्स शीर्षथासय् दुसा चेल्सी व भ्यालेन्सिया नं समान ७÷७ अंक हे दुसां गोलअन्तरया कारणं छसिकथं निगूगु व स्वंगूगु थासय् दु ।
मेखे बार्सिलोनां धाःसा क्लब स्लाभिया लिसेया कासाय् सुपरस्टार कासामि लियोनल मेसीं तःगू ह्वःताः सितिकं छ्वयेवं गोलरहित बराबरीइ चित्त बुझे यायेमाःगु दु । थःगु घरेलु मैदानय् चेक क्लब स्लाभियायात दबाबय् तयातःसां स्लाभियाया बल्लाःगु रक्षापंक्ति धाःसा त्वाःथले मफुत । बार्साया निंतिं मेसीं तःगू प्रहार याःगु खःसां गुगुं बल बारय् लाना वनसा गुगुं बल गोलकिपरं पनाबिउगु खः । समूह एफय् बार्सिलोना ८ अंक कयाः शीर्ष थासय् दु ।
LEAVE YOUR COMMENTS