ने. सं. ११४३ ञलाथ्व चतुर्दशी -

डेनमार्क फिनल्यान्डपाखें पराजित, इरिक्सनयात हाेस वल

एजेन्सी- डेनमार्कया निंतिं थुगुसीया युरोकपया थःगु न्हापांगु कासा तसकं म्हाइपुगु जूगु दु । शनिवाः चान्हय् फिनल्यान्ड लिसे जूगु कासाय् छखे कासाया झ्वलय् हे छम्ह महत्वपूर्ण कासामि क्रिस्टिन इरिक्सनयात बेहोस जुइवं अस्पताल भर्ना यायेमाःगु दुसा मेखे कमजोर टिम पाखें थःगु हे मैदानय् पराजय फयेमाःगु दु ।

डेनमार्कयात कासाया झ्वलय् छगू पेनाल्टिया ह्वःताः नं वःगु खःसा उकी नं गोल याये मफयेवं डेनमार्कं थुगुसी तिनि न्हापांखुसी युरोकप म्हितःवःगु फिनल्यान्डपाखें ०–१ गोलं पराजित जुयाः म्हाइपुक कासा क्वचायेकेमाःगु खः ।

काेपेनहेगनय् ज ूगु कासाया न्हापांगु हाफय क्वचायेत्यःगु इलय् डेनमार्कया अनुभवी कासामि इरिक्सन बेहोस जुयाः मैदानय् हे क्वःदःगु खः । इरिक्सन बेहोस जुइवं छुं ईया निंतिं कासा स्थगित याःगु खःसा लिपा इरिक्सनयात होसय् वःगु खबर वयेवं हाकनं कासा सुरु याःगु खः ।

कासाया ५९ औं मिनेटय् जोएल पोजापालों हेड पाखें फिनल्यान्डया निंतिं ऐतिहासिक गोल याःगु खः । काउन्टर एट्याकया झ्वलय् जेरे युरोनेनं बिउगु पासय् पोजापालों हेड गोल याःगु खः । थ्व गोल युरो कपय् फिनल्यान्डपाखें जूगु न्हापांगु गोल खःसा थ्व हे गोल पाखें युरो कपय् डेब्यु कासाय् हे फिनल्यान्डं ऐतिहासिक विजय चूलाकूगु खः ।

कासाय् पूवंक धयाथें डेनमार्क फिनल्यान्डयात दबाबय् लाकातःगु खःसां गोल यायेमफुत । कासाया ७४ औं मिनेटय् छगू पेनाल्टिया ह्वःताः नं चूलाःगु खः । तर पिएरे इमिले होज्ब्रेगं थ्वाःगु पेनाल्टि फिनल्यान्डया गोलकिपर हाराडेकें पनाबिउगु खः । फिनल्यान्डया विजयया निंतिं हाराडेके नायक सावित जूगु खः । वं डेनमार्कया तःगू हे प्रहारयात असफल यानाबिउगु खः ।