गाजाय् चच्छि इजरायली आक्रमण, च्याम्ह सित

एजेन्सी – युद्ध अन्त्य यायेगु सम्भावित सम्झौताय् हमासं सहमति प्वंकूगु दाबी यानातःगु दुसां गाजाय् इजरायली आक्रमण जुयाच्वंगु दु । शनिबाः चच्छि जूगु आक्रमणय् लानाः म्होतिं नं च्याम्ह सीगु स्थानीय अधिकारीतय्सं धाःगु दु । हमासं शुक्रबाः अमेरिकी राष्ट्रपति डोनाल्ड ट्रम्पं प्रस्ताव याःगु योजनाय् सहमति प्वंकूगु खः । उगु योजनाय् ल्वाभः लःल्हाये गु लिसें गाजा क्षेत्रपाखें इजरायली सेनायात छसिकथं लित यंकेगु सम्बन्धी प्रावधान दुथ्याकातःगु दु । इजरायलं धाःसा थुकिया बारे औपचारिक प्रतिक्रिया बिउगु मदुनि । इजरायली राजनीतिक स्रोतया धापू न्ह्यथसें एएफपीं हमास ‘पूवंक निःशस्त्रीकरण’ मजूतले सेनायात छुं नं कथं लित मयंकेगु इजरायलया रणनीति दु ।

मध्य गाजा क्षेत्रय् इजरायली सैन्य हेलिकप्टरं छगू अपार्टमेन्टय् याःगु आक्रमणय् छम्ह मिजं व वया कलाः सीगु व मेपिं छुं ल्याखय् घाःपाः जूगु नागरिक सुरक्षा प्रवक्तां धाःगु दु । अथे हे गाजा सहरया पश्चिमय् लाःगु मेगु अपार्टमेन्टय् जूगु आक्रमणय् छम्ह ज्याथः व छम्ह मचा सीगु खःसा दक्षिणी गाजाया खानयुनिसया उत्तर-पश्चिमय् च्वंगु मेगु अपार्टमेन्टय् याःगु आक्रमणय् छम्ह मचालिसें स्वम्ह सीगु अधिकारीतय्सं धाःगु दु ।