लिगय् २८ म्ह विदेशी कासामि
येँ – शहिद स्मारक ‘ए’ डिभिजन लिगय् सहभागी जूगु १४ गू क्लब मध्ये गुंगू क्लबं जक २८ म्ह विदेशी कासामि म्हितकेत्यंगु दु । नाइजेरियाया १२, क्यामरुनया ५, आइभरीकोस्टया ४, गिनी व मालीया निम्ह निम्ह अले बड्डलादेश, घाना व बुर्किना फासोया छम्ह छम्ह कासामि ए डिभिजन लिगय् म्हितेत्यंगु दु ।
थ्री स्टार, जावलाखेल युथ क्लब, फ्रेन्ड्स क्लब, मनाङ मस्र्याङ्डी क्लब, संकटा, सरस्वती युथ क्लब, एनआरटी, ब्रिगेड ब्वाइज व हिमालयन शेर्पां विदेशी कासामि अनुबन्ध याःगु खः । च्यासल युथ क्लब व मछिन्द्र क्लबं धाःसा विदेशी कासामि अनुबन्ध याःगु मदुनि । लिगय् च्वंगु स्वंगू विभागिय टिमं विदेशी कासामि म्हितके मदु ।
अखिल नेपाल फुटबल सघ एन्फां छगू क्लबं प्यम्ह सिबें अप्व विदेशी कासामि तये मदइगु मापदण्ड कायम यानातःगु दु । प्यम्ह विदेशी कासामि मध्ये छम्ह सार्क देय्याम्ह जुइमा । सार्कं पिनेयाम्ह स्वम्ह जक विदेशी कासामि अनुबन्धयात धाःसा थ्व नियम लागु जुइमखु ।
वि.स. २०७१ साल लिपा असोज १३ गते निसें शहिद स्मारक लिग जुइत्यंंगुु दु ।
राउण्ड रोविनया आधार जुइगु लिगय् ९१ गू कासा जुइ । लिग विजेतायात ५० लाख, उपविजेतायात ३५ लाख, स्वंगूगु थाय्यात २५ लाख, प्यंगूगु थाय्यात १५ लाख, न्यागूगु थाय्यात ७ लाख व खुगूगु थासय्यात ५ लाख पुरस्कार बिइगु जुइ ।
फेयर प्ले टिमयात १ लाख पुरस्कार बिइत्यंगु दु । हरेक कासा त्याःगु टिमयात एन्फां ५० हजार व म्यान अफ दि म्याचयात १० हजार बिइगु जुइ । लिग विजेता एशियन कप फुटबलय् सहभागी जुइदइगु खँ लिग निर्देशक सञ्जीव मिश्रं धयादीगु दु ।
LEAVE YOUR COMMENTS