देय्न्यंक ग्यास अभाव तच्वल
आपूर्ति नियमित दुगु निगमया दावी, उपभोक्तात ग्यास उद्योगय् हे लाइनय्
येँ (नेपालभाषा टाइम्स) – आयल निगमं बजारय् माक्व नसा ज्वलं दयेकेगु निंतिं माःगु ग्यास दुगु खँ धायेगु यानाच्वंसां नं बजारय् धाःसा ग्यासया अभाव जुयाच्वंगु दु । निगमं आपूर्ति सहज जूगु धासें वंगु असार ३१ गते निसें जाःगु ग्यास मीत निर्देशन बीधुंकाः बजारय् ग्यासया अभाव जूगु खः । थ्व स्वयां न्ह्यः आयल निगमं ग्यास आपूर्ति असहज जूगु धासें २०८२ फागुन लिपांगु वाःनिसें बजारय् बछि अर्थात ७.१ किलो जक दुगु ग्यास मीत निर्देशन बिउगु खः ।
आः निगमं १४.२ किलोया ग्यास आपूर्ति यायेधुंकाः आकाझाकां बजारय् ग्यास अभाव जूगु दु । ग्यास अभावया कारणं उपभोक्तात ग्यास कायेत खाली सिसिन्डर ज्वनाः लाइन च्वनेमाःगु अवस्था जुयाच्वंगु दु । तर आयाल निमगं धाःसा बजारया माग स्वयां अप्वः ग्यास आपूर्ति जुयाच्वंगु दाबी याःगु दु । निगमं भारतं नं ग्यसाया आयात पूर्ण क्षमताय् जुयाच्वंगु खँ धाःगु दु ।
तर आयोगया दावी अःखः त्वाः त्वालय् च्वंगु ग्यास डिपोय् ग्यास मदयेवं उपभोक्तातय्सं तप्यंक उद्योगय् हे वनाः लाइन च्वनेगु शुरु यानाहःगु दु । थ्व झ्वलय् उपभोक्तात नेपाल ग्यासया बालाजुइ च्वंगु उद्योगय् वनाः लाइन च्वंवंगु खः । उपभोक्तातय्सं डिपोय् ग्यास मवःगुलिं तप्यंक उद्योगय् वयाः लाइन च्वनेमाःगु खँ धाःगु दु ।
ग्यास डिपोय् माक्वः ग्यास मवयाच्वंगु खँ डिपोवालातय्सं धाःगु दु । टेकुया छम्ह ग्यास डिपोवालाया कथं छकः ग्यास वइबलय् झिंन्यागः निसें नीगः जक वयेगु यानाच्वंगु दु । ‘थुलि ग्यास वयाः ग्राहकतय्त बीत गन गाइ ?’ वय्कलं न्ह्यसः तयादिल । वय्कःया कथं ग्यास कम्पनीपाखें डिपोवालातय्त माक्व ग्यास मवःगु कारणं हे बजारय् अभाव जूगु खः ।
उकथं हे यलया छम्ह डिपोवालां नं थःत न्हिं ७० गः धयाथेंं ग्यास माःसां कम्पनी माक्व ग्यास छ्वया महःगुलिं थः नियमित ग्राहकतय्त हे ग्यास बी मफयाच्वंगु खँ धयादीगुु दु ।
चिकंया भाः थहांवनीगु
थ्वहे झ्वलय् भारतं पेट्रोलियम पदार्थया न्हूगु भाः छ्वयाहःगु दु । न्हूगु भाः कथं आः पेट्रोलियम पदार्थ भाः थहां वनीगु जूगु दु । निगमया सञ्चालक समितिया बैठक च्वने मफयाच्वंगुली पेट्रोलियम पदार्थया न्हूगु भाः क्वःछी मफुगु खँ धाःगु दु ।
आयल निगमं सामान्यतया अंग्रेजी महिनाया १ व १६ तारिखय् पेट्रोलियम पदार्थया भाः क्वःछीगु याइ । भारतया इन्डियन आयल कर्पोरेशनं १५ तारिख व लाया लिपांगु न्हिकुन्हु न्हूगु भाः छ्वयाहयेगु याइ । उकिया आधारय् निगमं भाः क्वःछी । निगमं स्वचालित प्रणाली कथं २ तका थकायेगु वा क्वकायेगु याइसां वयां अप्वः भाः थहां कुहां जुल धाःसा सञ्चालक समितिं हे निर्णय यायेमाःगु व्यवस्था दु ।
LEAVE YOUR COMMENTS