उत्तर कोरियाविरुद्ध न्ववाइगु लाउडस्पीकर

दक्षिण कोरियां उत्तर कोरियाया सीमाय तयातःगु लाउडस्पीकरत चिइकेगु सुरु याःगु दु । थुकिया लिसें उत्तर कोरियां नं थःपिंसं तयातःगु स्पीकर लिकाइगु विश्वास प्वंकूगु दु । निगुलिं देशं सीमाय् तयातःगु थ्व स्पीकरपाखें विपक्षी देय्या विरुद्ध प्रचार प्रसार यायेगु याना वयाच्वंगु दु । वंगु वालय् निगू कोरियाया नेतातय् शिखर वार्ता लिपा थ्व स्पीकर चिइकेगु ज्या सुरु याःगु खः ।

उगु वार्ताय् शान्ति स्थापना निंतिं जूगु सहमतिया पहलया संकेत कथं दक्षिण कोरियां थ्व स्पीकर चिइकेगु सुरु याःगु खँ धाःगु दु ।दक्षिण कोरियां थ्व लाउडस्पीकर सन् १९६०या दशकय् तःगु खः, उबलय् निसें थ्व लाउडस्पीकर पाखें पप म्ये हायेगु निसें समाचार प्रशारण यायेगु याना वयाच्वंगु खः ।

अले थ्व स्पीकरपाखें विशेषतः उत्तर कोरियाली सैनिकतय् ध्यान सालेत सामग्री प्रशारण यायेगु यानाच्वंगु खः, ताकि उमित नं थः नेताप्रति शंका ब्वलनेमाः । दक्षिण कोरियां आःतक गुलि स्पीकर गन गन तयातयागु दु धयागु स्पष्ट धाःगु मदुनि तर निम्ह नेतातय् वार्ता जुइ न्ह्यः हे थ्व स्पीकर धाःसा बन्द यायेधुंकूगु खः ।

छवाः न्ह्यव शुक्रवाः दक्षिण कोरियाया राष्ट्रपति मून जे इन व उत्तर कोरियाया नेता किम जोंग उन दथुइ जूगु वार्ताय् निगू देय् दथुइ तनाव म्हो यायेगु व कोरिया प्रायद्वीपयात परमाणु हतियार मुक्त यायेगु सहमति जूगु खः ।