
सउदी पत्रकार जमाल खाशोज्जीयात इस्तानबुलय् च्वंगु सउदी दूतावासय् थ्यनेवं गःपः तियाः स्याःगु खँ टर्किं धाःगु दु । पत्रका खाशोज्जीयात गुकथं स्यात धयागु बारे टर्कि न्हापांखुसी आधिकारिक वक्तव्य पितबिसें थ्व खँ धागु दु । सउदीया वाणिज्य दूतावासय् २ अक्टोवर जूगु थ्व हत्यायात कयाः मिडियाय् लछियंकं खबर वयेधुंकाः तिनि टर्किं आधारिक वक्तव्य पितबिउगु खः ।
टर्किं खाशोज्जीयात गःपः तियाः स्याःगु धाःसां उकिया प्रमाण धाःसा न्ह्यब्वःगु मदु । थुकिं पितबिउगु वक्तव्यय् धयातःगु दु, ‘न्हापा हे दयेकातःगु योजना कथं जमाल खशोज्जी सउदी अरबया वाणिज्य दूतावासय् थ्यनेवं तुरुन्त हे गःपः तियाः स्यानाबिउगु खः ।’ लिसें वक्तव्यय् योजना कथं वयागु सीम्हयात कुचा कुचा यानाः नष्ट यानाबिउगु खँ नं धयातःगु दु ।
टर्किया मुख्य अभियोजक इरफान फिदानं सउदीया थः समकक्षीलिसे खँ ल्हाःगु खः । फिदानं थ्व खँल्हाबल्हाय् छुं ठोस लिच्वः पिहां मवःगु खँ धाःगु दु । थ्व खँल्हाबल्हा लिपा पिहां वःगु टर्किया वक्तव्ययात कयाः सउदी अरबं छुं टिप्पणी याःगु मदुनि ।खाशोज्जी सउदी नागरिक खःसां अमेरिकी मिडियाय् च्वनाः सउदी शासकतय् तच्वःगु आलोचना याना वयाच्वंम्ह खः ।
वयागु सीम्ह आःतक लुइकेफुगु मदुनि । सउदी अरबं नं वयागु हत्या दूतावास दुने हे जूगु स्वीकार यायेधुंकूगु दु । सउदी दूतावास दुने जूगु ल्वापुइ खाशोज्जीया हत्या जूगु खँ जक धाःगु दु । थ्व हत्यायात कयाः जिम्मेवार तायेकाच्वंगु सउदी अरबया शाही परिवारलिसे टर्किं स्वापू त्वाःथःगु दु । सउदी अरबं थुकी शाही परिवारया भूमिका मदु धया वयाच्वंगु दु ।
टर्किया छम्ह अधिकारीं थःके खाशोज्जीया हत्याया प्रमाणित यायेत अडियो भिडियो सबूत दुगु दावी यानाच्वंगु दु, तर वय्कलं थ्व प्रमाणयात धाःसा सार्वजनिक याःगु मदुनि । टर्किया मिडियां खाशोज्जीया हत्या न्ह्यः वयात यातना नं बिउगु खँ धयाच्वंगु दु ।
LEAVE YOUR COMMENTS