बांलाःम्ह मिसाया ब्निंतिं

बांंलाःम्ह, भिंम्ह, ब्वनातःम्ह, मिसा इहिपा यायेगु निंतिं यक्व थें मिजंतय्सं कामना याःगु दयेमाः । अथे हे मिसातय्सं नं अज्याःपिं हे भाःत लायेमाः धकाः इच्छा यानाच्वंगु दइ । अझ मिसातय्सं ला थम्हं खना थेंज्याःम्ह मिजं लायेमा धकाः वाःपतिकं व्रत च्वनेगु नं यानाच्वंगु व खनाच्वंगु हे खः ।

तर सुं मिजं द्यःयाथाय् वनाः भिंम्ह, बांलाःम्ह, शिक्षित, सुन्दर, सुशील मिसा कलाः दयेमाः धकाः वरदान फ्वनेत वनी धायेबलय् पत्याः मजुइफु । व नं मिसातय्सं थें बांलाक समाः यानाः बांलाःम्ह कलाः लायेमाः धकाः फ्वनीगु खँया झन् हे पत्याः याये थाकु ।
भारतया छगः देगलय् मिजंतय्सं मिसातय्सं थें हे समाः यानाः द्यःया पुजा अर्चना याइ ।

अन द्यःयाथाय् वनीपिं गुलि नं मिजंत दु, इपिं सकसिगु ध्येय व उद्देश्य धइगु छगू हे जक खः, व खः बांलाःम्ह मिसा कलाः लायेमाः । अले उकिया नापनापं गुलिसिं बांलाःगु जागिर नं फ्वनीपिं दु । भारतया केरला राज्यय् च्वंगु द्यःयाथाय् वरदान फ्वनेत वनीपिं सकलें मिजंत मिसात थें हे समाः यानाः पर्सि सिनाः वनीगु खः ।

केरला राज्यया कोल्लम जिल्लाया कोट्टनकुलंगरा धइगु थासय् च्वंगु श्रीदेवी द्यःयाथाय् मार्च २३ व २४ य् न्यायेकीगु छगू विशेष ्पर्वय् मिसातय्सं थें हे झःझः धायेक समाः यानाः वइपिं मिजंत म्वःम्वः हे दइ ।