मस्तय्त झ्यातुगु झोला क्वबीके मदु

येँ – भारत सरकारं आवंलि स्कूल वनीपिं मस्तय्त सफूया भारी क्वबीके मदइगु नियम लागू याःगु दु । यक्व यक्व सफू दुगु ब्याग क्वबिया वनीपिं मस्तय्के दुगः क्वँय् सम्बन्धी ल्वय्त खने दयावयेवं सरकारं थज्याःगु नियम लागू याःगु खः ।

अनया एशोसियट च्याम्बर अफ कमर्स एण्ड इण्डष्ट्रिजं याःगु छगू सर्वेक्षण कथं झ्यातुगु स्कूल ब्याग क्वबिया वनीपिं ६८ प्रतिशत मस्तय्त जँ स्याइगु ल्वय् दुगु व लिपा वनाः थ्व ल्वचं दुगः क्वँचय् समस्या पिकाइगु खँ सीदुगु दु । स्कूल वनीपिं २५०० म्ह मस्तय्त याना स्वःगु छगू मेगु सर्वेक्षण कथं ७ निसें १३ दँया ८८ प्रतिशत मस्तय्सं थःगु हे म्हया तौलया ४५ प्रतिशत झ्यातुगु झोला क्वबियाः स्कूल वनेगु यानाच्वंगु दु ।

आः सरकारं जारी याःगु निर्देशनय् मस्तय्त उमिगु म्हया तौलया १० प्रतिशत जक झ्यातुगु झोला क्वबीके दइगु खँ दुथ्याकातःगु दु । भारत सरकारं जारी याःगु थ्व निर्देशनया अनया अभिभावकतय्सं लसकुस याःगु दु ।नेपालय् नं आपालं निजी स्कूलतय्सं मस्तय्त तसकं झ्यातुगु ब्याग क्वबियाः स्कूल माली कथं ब्वंकेगु ज्या यानाच्वंगु दु ।

सम्बन्धित बुखँ

LEAVE YOUR COMMENTS