स्वतन्त्र जुइगु नामय्

स्वतन्त्र जुइगु नामय्
झंझं लिकुना
वनाच्वनाम्ह जि
जिगु थाय् गुलि चकंगु खः
गन जि उखे थुखें ब्वाँय् जुइगु खः
गन जि तिं तिं न्हुयाः
म्हितेगु खः
गन पाहांचःह्रेबलय्
द्यः खः ब्वाकेगु खः
तर थौं
जिं स्वतन्त्र ला जुल
जि झं झं लिकुना वनाच्वन
जिगु स्वतन्त्रतां
जितः नया बिउगु दु
जिगु उगु चकंंगु ख्यः
द्यःखः ब्वाकेगु जिगु लँपु
जिगु स्वतन्त्रतां नुना बिउगु दु ।
खः स्वतन्त्रया नामय् चकने मखंम्ह जि !
झं झं लिकुना वनाच्वना
झं झं कयेकुना वनाच्वना
ग्वः गुलि लिकुनेगु
ग्वः गुलि कयेकुनेगु
लिकुनेगु व कयेकुनेगु
थ्व धेंधेंबल्ला कासा
गबलय् क्वचाइगु खः ?
वा जिगु थ्व स्वतन्त्रतां
जितः गन थ्यंकीगु खः ?
जिगु स्वतन्त्रता
चकनेमाःगु खः
तःब्या जुयाः
न्यना वयेमाःगु खः ?
तर थ्व छु जूगु
फुक्कं फुक्कं अःखः
छगू पूमवंगु म्हगस थें
न्हिलाः म्वाये मफुगु थ्व स्वतन्त्रतायात
मसिउ जिं गबले तक थः नाले
गुम्ह थःहे मजूम्हेसित !

सम्बन्धित बुखँ

LEAVE YOUR COMMENTS