ने. सं. ११४६ दिल्लागा तृतीया -

मचा म्हितेगु कासा मखु सरकार सञ्चालन

वर्तमान सरकार गुलि असक्षम धयागु खँ सुनसरी घटनां उला बिउगु दु । सुनसरीया देवानगञ्जय् जूगु सामान्य ल्वापु हिंसात्मक जूगु धयागु निश्चित रुपं सरकारया कमजोरीया दसि खः । वंगु आइतवाः बहनी निगू समुदाय दथुइ जूगु ल्वापु अन्ततः हिंसात्मक जुयाः मधेशया थीथी न्यागू जिल्लाय् न्यना वने धुंकूगु दु । आइतवाःया घटनाय् गोलीं कयाः छम्ह सीवं उकिं ब्वलंकीगु अवस्थायात सरकारं इलय् बिचाः याये मफयेवं सोमवाः निसें विरोधया ज्याझ्वः अझतच्वया वंगु खः । थुकियात नियन्त्रण यायेगु निंतिं प्रधानमन्त्री व गृहमन्त्रीपाखे ं माक्व भूमिका म्हितेगु मफुगु खँ स्पष्ट जुइधुंकूगु दु ।

घटना जुइवं गृहमन्त्री वा प्रधानमन्त्रीं सुरक्षा निकाय लिसे समन्वय यानाः हिंसात्मक घटनायात गुकथं नियन्त्रणय् कायेगु धकाः सहलह ब्याके माःगु खः । तर सुरक्षा निकाय लिसे ब्रिफिङ कायेगु ज्या न त प्रधानमन्त्री बालेन शाहं यात न त गृहमन्त्री सुधन गुरुङं हे यात । सरकारं इलय् सुरक्षा निकायलिसे समन्वय मयाःगु धयागु सरकारया नेतृत्व यानाच्वंपिंके हे देशय् छु जुल धाःसा गज्याःगु पलाः ल्ह्वने माः धयागु ज्ञान तकं मदुगुलिं खः धयागु खँ स्पष्ट जूगु दु ।

सुनसरीया घटना तच्वया वनेवं सरकारं थीथी राजनीतिक पार्टी लिसे समन्वय वा सर्वदलीय बैठक सःताः घटनाक्रमयात मत्थर यायेगु निंतिं ग्वाहालि फ्वनेगु वा घटनायात गुकथं नियन्त्रण कायेगु धकाः सल्लाह यायेमाःगु खः । थ्व ज्या नं सरकारं मयाः । सरकारं छुं गुगुं नं कथंया सम्बोधन मयायेवं न्हापा सुनसरीइ जक जुयाच्वंगु आन्दोलन अन्ततः मेगु न्यागू जिल्लाय् न्यनावनेगुया लिसें थप छम्हेसिया ज्यान वंगु दु ।

सुनसरीइ ब्वलंगु आक्रोशयात तत्काल सम्बोधन यायेगु ज्या मजूगु धयागु सरकारया अकर्मन्यता खः धयागु खँ स्पष्ट जुइधुंकूगु दु । बरु थुकिया दथुइ लिबाक हे जूसां राष्ट्रिय स्वतन्त्र पार्टीया सभापति रवि लामिछानें सर्वदलीय बैठक सःते गु ज्या याःगु जक मखुसें घटनायात नियन्त्रणय् कायेत छु गज्याःगु ज्या यायेमाः धयागु सुझाव कयाः राजनीतिक परिपक्वता ब्वःगु दु । पार्टीया सभापति हे सक्रिय जुयाः सर्वदलीय बैठक सःते धुंकाः तक नं सरकारं धाःसा अज्याःगु बैठक सःतेगु खँय् वास्ता मयाः ।

मधेश केन्द्रित आन्दोलन तच्वया वनाच्वंगु इलय् हे संसदया बैठक नं जुयाच्वंगु दु । संसदय् थीथी पार्टीया नेतातय्सं जक मखु स्वयं सत्तारुढ राष्ट्रिय स्वतन्त्र पार्टीया सांसदतय्सं तकं सरकार आन्दोलनयात नियन्त्रणय् कायेत असफल जूगु व सरकारं सदनय् वयाः जानकारी बीमाःगु माग याःगु खः । तर सरकारं थ्व पालय् नं सांसदतय् माग मन्यं । संदनं प्रधानमन्त्री व गृहमन्त्री सदनय् उपस्थित जुयाः घटनाक्रमयात कयाः ब्रिफिङ याये माःगु माग याःसां नं उकियात बेवास्ता यायेगु ज्या जुल । सभामुख डोलप्रसाद अर्यालं तकं प्रधानमन्त्री बालेन शाहयात नापलानाः संसदय् वयाः सम्बोधन यायेत सुझाव बिउगु खः । तर सभामुखया सुझावयात नं प्रधानमन्त्री बालेन शाहं बेवास्ता यानाबिल ।

गुगुं नं कथंया हिंसात्मक घटना जुइधुंकाः उकियात नियन्त्रण कायेत यक्व कथंया ज्या सरकारं यायेमाः । उकिया निंतिं न्हापा न्हापा जूगु घटनाक्रमयात जक दुवालाः स्वःगु खःसा नं घटनायात नियन्त्रण काये त ताः ई मकाइगु खः । न्हापा न्हापा नं मधेश लागाय् थज्याःगु घटना आपालं जुइधुंकूगु दु । उकियात नियन्त्रणय् कायेत तत्कालीन सरकार प्रमुखतय्सं सर्वदलीय बैठक सःतेगु जक मखुसे स्थानीय निकाययात तकं सक्रिय यानाः अज्याःगु हिंसात्मक घटना नियन्त्रण कायेगु ज्या याःगु दसु आपालं दु । तर थ्व सरकारं धाःसा थुकथं समन्वय यायेगु ज्याय् छाय् लिचिला च्वन धयागु न्ह्यसः ब्वलंगु दु । पुलांम्ह प्रधानमन्त्री पुष्पकमल दाहालं धाःथें दम्भया कारणं जक प्रधानमन्त्रीं बालेन शाहं विपक्षी दलयाके जक मखु थःगु हे पार्टीया नेतातय्के तकं सल्लाह काये गु ज्या मयाःगु खः ला धइगु न्ह्यसः ब्वलंकाबिउगु दु ।

घटनायात नियन्त्रणय् कायेत आपालं संयन्त्र दु । अझ धाय गु खःसा घटनायात नियन्त्रणय् काये गु निंतिं प्रदेश सरकार व स्थानीय सरकार, नागरिक समाज लिसे समन्वय यायेमाःगु खः । तर थज्याःगु गुगुं नं ज्या सरकारंं यायेगु कुतः याःगु खनेमदु । अझ धायेगु खःसा नागरिक समाजयात आः तक सरकारं गुबलें वास्ता तकं याःगु खनेमदु । उकथं हे थःगु हे पार्टीया मधेशया नेता कार्यकर्ता लिसे तकं सरकारं समन्वय यायेगु ज्या याःगु मदु । थ्व धयागु प्रधानमन्त्री थः हे सर्वज्ञानी तायेकूगु जक मखुला धयागु नं न्ह्यसः ब्वलनाच्वंगु दु ।

सुरक्षा प्रमुखतय्सं तकं प्रधानमन्त्री शाहयात हिसांत्मक घटना नियन्त्रणय् कायेगु निंतिं राजनीतिक संवाद न्ह्याकेत सुझाव बिउगु खः । तर प्रधानमन्त्री शाहं सुरक्षा प्रमुखतय्सं बिउगु सुझावयात नं कार्यान्वयन यायेगु ज्या मयाः । घटना जूगु न्यान्हु लिपा बल्ल छगू भिडियो सन्देश जारी यायेगु ज्या जुल ।

थ्व धयागु राजनीतिक अपरिपक्वताया लिच्वः खः । प्रधानमन्त्रीं राष्ट्रया नामय् सम्बोधन यायेगु धकाः धायेवं सदनपाखे सम्बोधन जुइगु वा राष्ट्रिय सञ्चार माध्यमं सम्बोधन जुइगु तायेकूगु खः । तर सामाजिक सञ्जालय् भिडियो छगू जारी यायेगु ज्या जुल । थ्व नं राजनीतिक परिपक्वता मखु ।

सुनसरीया घटना लिपा हे सरकारयात घटना तच्वया वनेफइगु सुचं मथ्यंगु पक्का नं मखु तर सरकारं उकियात वेवास्ता यात । गुकिया लिच्वः आन्दोलन नियन्त्रणय् वइगु स्वयां नं अझ तच्वया वन । सरकारं स्थिति नियन्त्रणय् कायेगु उपाय धयागु कफ्र्युयात जक तायेकल वा सुरक्षाकर्मी परिचालनयात जक तायेकल । सरकार चुके जूगु थनथाय् लाक्क हे खः ।

देशय् ब्वलनीगु गुगुं नं घटनायात नियन्त्रणय् कायेगु निंतिं सुरक्षाकर्मी जक पर्याप्त मखु धयागु आपालं घटनाक्रमं स्पष्ट यानाच्वंगु दु । समग्र रुपं स्वयेगु खःसा वर्तमान सरकार सक्षम मजू धयागु खँ स्पष्ट जुयाच्वंगु दु । अझ धाये गु खःसा वर्तमान सरकारया ज्या मचा म्हितेगु थें जूगु महसुस सर्वसाधारण जनतां यानाहःगु दु । तर सरकार सञ्चालन यायेगु धयागु मचा म्हितेगु मखु । उकिया निंतिं थीथी आपालं बिचाः यायेमाः । संसदया लिसे जनताप्रति जवाफदे ही जुइमाः । तर आःया सरकार याके जवाफदेहीताया हे अभाव दु । थज्याःगु पहलं सरकार सञ्चालन जुयाच्वन धाःसा देयया अस्तित्व हे खतराय् लाये फइगु खँय् सचेत जुइमाःगु आवश्यकता दु ।