गुटबन्दीं समस्याय् लाना वनाच्वंगु पार्टीत
वर्तमान इलय् नेपाःया पुलांगु राजनीतिक पार्टीत कमजोर जूगु महसुस आम जनता जक मखु स्वयं पार्टीया नेतातय्सं नं यानाच्वंगु दु । थुकिया लिसें नेपाःया परम्परागत राजनीतिक पार्टीत धाथें कमजोर हे जूगु खः ला धयागु न्ह्यसः नं ब्वलनाच्वंगु दु । जेनजी आन्दोलन लिपा जूगु आम निर्वाचनय् नेपाःया परम्परागत राजनीतिक पार्टीत बांमलाक्क पराजित जुल । थुकिया मू कारण धयागु छगू जेनजी आन्दोलन खःसा मेगु कारण धयागु थुपिं पार्टीया नेतातय्गु व्यवहार खः । नेतातय् व्यवहारं आजित जूपिं स्वयं पार्टीया कार्यकर्तातय्सं तकं थःगु पार्टीयात भोट मबिउ धयागु खँ आः स्पष्ट जुइधुंकूगु दु ।
उकिं आः परम्परागत राजनीतिक पार्टीतय्त कार्यकर्ता व समर्थकतय्सं हे छु कारणं भोट मबिल धकाः विश्लेषण यायेमाःगु आवश्यक दु । सामान्य रुपं जक विश्लेषण यायेगु खःसां पार्टीया नेतातय्सं यानाच्वंगु गुटबन्दी व थः आसेपासेतय्त जक पोसे यानाच्वंगु कारणं हे कार्यकर्ता व समर्थकतय्सं तकं थःगु पार्टीयात भोट मबिउगु धयागु सीदु । तर अझ नं नेतातय्सं थःगु कमजोरीयात स्वीकार यानाः थःगु आचरण भिंकेगु कुतः यानाच्वंगु मदुनि ।
राजनीतिक रुपं नेतृत्वय् वःपिं नेतातय्के थीथी गुण दयेमाः । अले दकलय् न्हापां माःगु गुण धयागु पार्टी दुनेया फुक्क कार्यकर्तातय्त थः हे तायेकेगु । गुम्हेसितं थःगु लिक्क तयाः गुम्हेसितं लित्तुलीगु ज्या राजनेतातय्सं याये मजिउ । तर थ्व खँयात नेपाःया राजनीतिक पार्टीया नेतातय्सं नाले फयाच्वंगु मदु । थुकिया दसु खः आः नं थीथी पार्टी दुने ब्वलनाच्वंगु गुटबन्दी व विवाद । थ्व हे गुटबन्दीया कारणं छगू हे पार्टीइ च्वनाच्वंपिं नेता कार्यकर्तात छप्पँ जुइ फयाच्वंगु मदु । थ्व इलय् दकलय् तच्वःगु गुटबन्दीया समस्याय् लानाच्वंगु पार्टी धयागु नेपाली कांग्रेस खः ।
खय्त ला कांग्रेस दुने गुटबन्दी मजू धयागु गुबलें मदु । गुबलें गिरिजाप्रसाद कोइराला व कृष्णप्रसाद भट्टराइया गुट, गुबलें शेरबहादुर देउवाया गुट । आः गगन थापा, शेरबहादुर व शेखर कोइरालाया गुट दकलय् तःधंगु समस्या जुयाः न्ह्यःने वयाच्वंगु दु । नेपाली कांग्रेसया पुलांपिं नेतातय्सं आःया न्हू नेतृत्वयात स्वीकार याये फयाच्वंगु मदु । गुकिया कारणं यानाः पार्टी हे कुचा दलीगु खः ला धयागु अवस्था ब्वलनाच्वंगु दु । संस्थापन पक्ष व पुलांपिं नेतातय् दथुइ थःथःगु हे गुटबन्दी यायेगु ज्या जक जुयाच्वंगु मखसे छगू पुचलं मेगु पुचःयात स्वीकार तक याये मफइगु अवस्था नेपाली कांग्रेस दुने खने दयावःगु दु । तर पार्टी दुनेया समस्या गुकथं ज्यंकेगु धयागु बारे धाःसाखास हे बहस जुयाच्वंगु खनेमदु ।
थज्याःगु हे अवस्था नेकपा एमालेय् नं विद्यमान जुयाच्वंगु दु । एमालेया अध्यक्ष केपी शर्मा ओलीं अझ नं थः हे सर्वज्ञानी व सर्वेसर्वा तायेकाच्वंगु दु । थःगु खँयात स्वीकार मयाइपिंत ओली लित्तु लीगु जक मखुसं पार्टीं हे पितिनेगु ज्यायात आः नं निरन्तरता बियाच्वंगु दु । गुकिया लिच्वः कथं कार्यकर्ता दथुइ व्यापाक असन्तुष्टि तच्वयावनाच्वंगु दु । तर पार्टी अध्यक्ष ओली उकियात थुलि हलुकां नक्सां कयाच्वंगु दु कि पार्टी थःगु पक्ष बाहेक मेगु पक्ष मदुसां छुं मपाः धयागु व्यवहार यानाच्वंगु दु । गुकिं यानाः पार्टीइ दुनें दुनें असन्तुष्टि तच्वया वनाच्वंगु दु । थुकथं असन्तुष्टि तच्वया वनेगु धयागु अन्ततः लिच्वः लाइगु पार्टीयात हे खः धयागु खँ स्वीकार यायेत अझ नं पार्टी अध्यक्ष ओली तयार मदु । छखे पार्टीया कार्यकर्तात पार्टीपाखें निराश जुयाः पार्टी त्वःताः वनाच्वंगु दुसा मेखे अध्यक्ष ओली पार्टीयात न्हू कथं पुनर्जीवन बीमाः धयागु पक्षय् हे खनेमदु । फयांफछि थः विरोधीतय्त गुकथं जिउ उकथं ध्याकुनय् लाकेगु ज्या याना हे च्वंगु दु । पार्टी बैठकय् नेतातय्त खँ तकं तयेगु वातावरण मबीगु धयागु निरंकुशताया छुमाः खः ।
उकथं हे नेपाली कम्युनिष्ट पार्टी दुने नं नेतृत्व पुस्तान्तरणया सः निरन्तर थ्वयाच्वंगु दु । तर पार्टी नेतृत्व पंक्तिं उकियात अझ नं स्वीकार याये फयाच्वंगु मदुनि । खय्त ला पार्टीया संयोजक पुष्पकमल दाहालं नेतृत्व पुस्तान्तरण यायेमाःगु खँ धायेगु यानाच्वंसां नं उकियात व्यवहारय् यंकेगु खँय् अलमल यानाच्वंगु दु । अथे धयागु अझ नं थः बाहेक पार्टीइ मेपिं मदु धयाथेंज्याःगु खँ धायेगु यानाच्वंगु दु । थ्व नं पार्टीया निंतिं पाय्छिगु खँ मखु । तत्कालीन माओवादी पार्टीया निरन्तरता हे खः नेपाली कम्युनिष्ट पार्टी । न्हापा माओवादीकालय् गुलि कार्यकर्ता दुगु खः आः उकिया बछि नं नेपाली कम्युनिष्ट पार्टीइ मदयेधुंकूगु अवस्था दु । तर थ्व खँयात नेतातय्सं स्वीकार यायेगु ज्या धाःसा अझ नं यानाच्वंगु मदुनि ।
आःया अवस्थाय् स्वयेगु खःसा फुक्क धयाथें पुलांगु पार्टी क्षयीकरण जुयाः वनाच्वंगु दु । अथे धयागु नेतातय्गु पद लोलुपता व थः हे जक मसीतले सर्वेसर्वा जुयाच्वनेमाः धयागु धारणया कारणं यानाः न्हापा पार्टीइ दुपिं कार्यकर्तातय्सं नं धमाधम पार्टी त्वःता वनाच्वंगु दु । तर नेतृत्व वर्ग धाःसा अझ नं पुलांगु हे तालं न्ह्यायेगु कुतः यानाच्वंगु दु । थुकिया प्रत्यक्ष लिच्वः पूवंक देय्यात हे लानाच्वंगु दु ।
पार्टी नेतृत्वया अक्षमताया कारणं वर्तमान सरकारं यानाच्वंगु गलत ज्यायात कयाः विरोध यायेगु क्षमता तकं राजनीतिक पार्टीतय्के मदया वंगु अवस्था दु । थ्व धयागु पार्टीया क्षयीकरण जक जूगु मखु देय्या निंतिं सः तइपिं तकं मदयावंगु खः । थौं सुकुम्बासी बस्तीं थनाछ्वःपिं सर्वसाधारण जनताया बेहाल जुयाच्वंगु दु । तर उकियात कयाः न्ववाइपिं राजनीतिक नेतृत्व हे मदयावंगु अवस्था दु ।
उकथं हे विद्यार्थी संगठन खारेज यायेगु लिसें कर्मचारी ट्रेड युनियन खारेज यायेगु थेंज्याःगु निर्णय विरुद्ध नं राजनीतिक पार्टीतय्सं आन्दोलन यायेफयाच्वंगु मदु । छगू इलय् छगू जक पार्टीं विरोधया ज्याझ्वः याःसां द्वलंद्वः कार्यकर्ता सतकय् खनेदइगु खःसा थौं थःपिनिगु विद्यार्थी संगठन लिसे थीथी कथंया भातृ संगठन खारेज यायेगु निर्णय जुलं नं उकिया विरुद्ध राजनीतिक पार्टीया भातृ संगठनत हे सतकय् कुहां वयेमफुगु धइगु पार्टी नेतृत्वया अक्षमता हे खः । पार्टी प्रति कार्यकर्ता दथुइ ब्वलंगु असन्तुष्टिया कारणं हे थौंया अवस्था वयाच्वंगु खः ।
राजनीतिक पार्टी धइगु जीवन्त जुइमाः । यदि राजनीतिक पार्टीत जीवन्त जुइमफुत धाःसा अज्याःगु राजनीतिक पार्टीया औचित्ययात कयाः हे न्ह्यसः ब्वलनेफु । थौंया अवस्थाय् स्वयेगु खःसा पुलांगु राजनीतिक पार्टी जीवन्त हे दु कि मदु धयागु न्ह्यसः तये माःगु अवस्था वःगु दु । अले राजनीतिक पार्टीया गतिविधि वा उमिसं यानाच्वंगु ज्यायात कयाः धायेगु खःसा थौं पुलांगु राजनीतिक पार्टी अस्तित्व तकं खतराय् लानाच्वंगु अवस्थाय् दु । अझ नं लाःनि, राजनीतिक पार्टीतय्सं थःगु अस्तित्व ल्यंकातयेगु खःसा थःत सुधार यानाः नेतृत्व हस्तान्तरण धिसिलाःगु पलाः छीमाः । आःया अवस्थाय् पार्टी बल्लाकेगु दकलय् बांलाःगु लँपु धयागु थ्व हे खः ।
LEAVE YOUR COMMENTS