ने. सं. ११४६ तछलागा षष्ठी -

महिउपिं राजनीतिक नेतात

नेपाःया पुलांगु राजनीतिक पार्टीत अझ नं सुध्रे जुइगु खनेमदु। जेनजी आन्दोलन लिपा हिलावंगु राजनीतिक परिस्थिति कथं पुलांगु राजनीतिक पार्टीइ नं हिउपाः वयेमाःगु खः । तर जेनजी आन्दोलन लिपा नं राजनीतिक पार्टीतय्सं थःत सुधार यायेगु लँपुइ यंकूगु खनेमदु। थुखेपाखे राजनीतिक पार्टीतय्सं बिचाः मयाःगु हे खः ला धइगु न्ह्यसः ब्वलनाच्वंगु दु। जेनजी आन्दोलन लिपा नेपाःया राजनीतिक परिदृष्य हिउगु जक मखु। पुलांगु राजनीतिक पार्टीया अस्तित्व तकं खतराय् लाःगु खः । न्हूगु पार्टी राष्ट्रिय स्वतन्त्र पार्टीं थ्यंमथ्यं निगू तिहाइ बहुमत कयाः चुनाव त्याकल । थुकिया मू कारण धयागु पुलांगु राजनीतिक पार्टी प्रति नेपाःमि जनताया वितृष्णा खः । तर राजनीतिक पार्टीत थ्व खँयात स्वीकार यायेत अझं तयार मदु धयागु खँ थौंकन्हय्या उमिगु व्यवहारं नं क्यनाच्वंगु दु ।

छगू इलय् नेपाःया राजनीतिइ नेपाली कांग्रेस, एमाले व नेकपाया स्वम्ह नेतातय्सं जक सत्ताया नेतृत्व यानाच्वंगु खः । उलि जक मखु पालंपाः सत्ताय् वनेगु निंतिं उमिसं गुगु कथंया ज्या याःगु खः, थुकिं जनतायात वाक्कदिक्क याःगु खः । लिच्वः कथं स्वंगू पार्टीया नेतात प्रति ल्याय्म्ह पुस्ताय् वितृष्णा ब्वलन । थ्व हे वितृष्णाया लिच्वः खः जेनजी आन्दोलन । अले जेनजी आन्दोलनया लिच्वः खः थौंया राजनीतिक परिस्थिति! पुलांगु राजनीतिक पार्टीतय्सं जनताया मनसाय थुइकाः ज्या याःगु खःसा न त जेनजी आन्दोलन जुइगु खः ! नत थौंया राजनीतिक परिस्थिति खनेदइगु खः । गन जनताया सःयात कदर याइ मखु अज्याःगु राजनीतिक पार्टीया नेतातय्सं जनतां गुकथं ध्याकुनय् लाकी धयागु छगू नमूना खः जेनजी आन्दोलन लिपा जूगु निर्वाचन व उकिया लिच्वः । तर थौं नं पुलांगु राजनीतिक पार्टीया नेतातय्सं पार्टी थःगु कब्जाय् तयेगु ज्या हे जक यानाच्वंगु दु ।

थौंया विश्व नेतातय्सं छु धाल उकियात पाय्छि धकाः तायेकीगु पुस्ता मखु धयागु खँ नं नेतातय्सं मथूगु मखु जुइमा, अय्सां मसिउपहः जक यानाच्वंगु खनेदु। थौंया जनताया दकलय् तःधंगु सः धयागु हे सामाजिक सञ्जाल जुयाच्वंगु दु। अझ धायेगु
खःसा थौं छु पाय्छि खः वा मखु, नेतां धाःगु खँ पाय्छि जू कि मजू धकाः जनतां याउँक सामाजिक सञ्जालपाखे सीकेफु। गुलिखे अवस्थाय् राजनीतिक नेतात स्वयं सर्वसाधारण जनताया न्ह्यःने लानाच्वंगु थौंया अवस्था खः । तर राजनीतिक पार्टीया नेतातय्के दुगु पुलांगु सोच अझ नं कायम हे दनि । थुकिया ज्वलन्त दसु खः थीथी राजनीतिक पार्टी दुने जुयाच्वंगु आन्तरिक ल्वापु। नेपाली कांग्रेस निसें कयाः एमाले व नेपाली कम्युनिष्ट पार्टी दुने पार्टी कब्जा यायेगु निंतिं गुटबन्दी व ल्वापु तच्वया वनाच्वंगु दु। उकियात पनेगु निंतिं माःगु पलाः ल्ह्वनेत नेतात हे पंगः जुयाच्वंगु दु ।

विशेष यानाः नेपाली कांग्रेसया न्हू पुस्ताया सभापति गगन थापायात मछिंकेगु ज्या शेरबहादुर देउवा पक्षं यानाच्वंगु दु। उकथं हे नेकपा एमालेया नेता केपी शर्मा ओलीयाके दुगु अहंकार आः तक नं म्हो मजूनि । युवा पुस्ता राजनीतिक नेतातय्त आः सक्रिय राजनीतिं विश्राम कयाः च्वनेत धायेगु यानाच्वंगु दु। तर नेतातय्सं विश्राम कायेगु नां तकं कयाच्वंगु मदु। थ्व धयागु राजनीतिक नेतातय्के अझ नं पदलोलुपता दनि धयागुया दसि खः । उमिसं जनताया चाहनायात थुइके मफुगु मखु, तर थःगु लोभ त्वःतेमफुगुलिं नेतृत्व त्वःते चाहे जुयाच्वंगु मदु। एमालेया अध्यक्ष केपी शर्मा ओलीं थःत सर्वज्ञानी तायेकेगु गुगु अहंकार क्यनाच्वंगु दु थुकिया कारणं नेकपा एमाले पार्टी धयागु हे मदया वनीगु खः ला धयागु अवस्था दु। तर थ्व खँ स्वीकार यायेत अध्यक्ष ओली जक मखु ओलीया लिउलिउ जुइपिं आपालं कार्यकर्ता तयार मदु। गल्तीयात गल्ती धाये फयेकेमाः । थ्व मान्यतायात हाचां गायेगु ज्याय् नेतात जक मखु उमित ग्वाकीपिं कार्यकर्तात नं उलि हे जिम्मेवार दु। अले थ्व खँ स्वीकार यायेत न त शीर्ष नेतात हे तयार दु नत नेतातय्त ग्वाकीपिं कार्यकर्तात हे तयार दु। थुकिया लिच्वः धयागु अन्ततः राजनीतिक पार्टीया अवसान हे खः ।

समस्या पुलांपिं नेतातय्के जक मखु न्हूपिं नेतातय्के नं दु धयागु दसु खः प्रदेशसभाय् जुयाच्वंगु ल्वापुं क्यनाच्वंगु दु। जेनजी आन्दोलन न्ह्यः प्रदेशसभाय् नं तःक्वः हे सरकार नीस्वनेगु व क्वथलेगु ज्या जूगु दु। अझ थःगु हे पार्टीया सरकार विरुद्ध वनेगु ज्या उगु इलय् नं जूगु खः । केन्द्रय् सत्ता गठबन्धन हिलेवं प्रदेशय् नं उकिया लिच्वः लाइगु यानाच्वंगु जक मखुसे तःक्वः सरकार नीस्वनेगु व क्वथलेगु ज्या जूगु खः । उकिया कारणं नं जनताय् छगू कथं वितृष्णा ब्वलंगु खः । थ्व ज्या जेनजी आन्दोलन लिपा निरन्तर मजुइ धकाः जनतां तायेकूगु खः । तर आः हाकनं अज्याःगु हे प्रवृत्तिं निरन्तरता कयाच्वंगु दु ।

थुकिया नमूना खः बागमति प्रदेश व सुदूरपश्चिम प्रदेशय् जुयाच्वंगु भागबन्दया ल्वापु। बागमति प्रदेशया मुख्यमन्त्री इन्द्र बानियाँया सरकार क्वथलेत नेपाली कांग्रेसया मेगु पुचः न्ह्याः वनाच्वंगु दु। उकथं हे सुदूरपश्चिमय् नेपाली कांग्रेस व एमालेया सरकार दु। तर अन नं सरकारं न्ह्यब्वःगु बजेटयात कयाः विवाद जुयाच्वंगु दु। बागमति प्रदेश व सुदूरपश्चिम प्रदेशय् बजेट पारित जुइ मफइगु अवस्थाय् मुख्यमन्त्रीं राजीनामा बीमाःगु अवस्था ब्वलनी । थुकिया कारणं हाकनं सरकारया समीकरण हिलाबुला यायेमाःगु अवस्था वइ । थ्व धयागु हाकनं सत्ताया कासा न्ह्याइ । तर थुकिया फाइदा जनतायात छु ले? थःगु हे पार्टीया सरकार क्वथलेगु वा थम्हं हे समर्थन यानातयागु पार्टीया सरकार थुकथं बारम्बार क्वःथलाः गज्याःगु राजनीतिक व्यवस्थापाखे झी वनाच्वना धयागु न्ह्यसः ब्वलनीगु स्वाभाविक खः ।

थौंया जनतां चाहे जूगु न्हापा थें खुला खुलाय् सरकार हिलेगु मखु। पूवंक न्यादँ तक सरकार चले यायेगु म्याण्डेट जनतां बिउगु खः धयागु खँयात ल्वमंकेगु ज्या गुगु राजनीतिक पार्टीतय्सं यानाच्वना थुकिया कारण कालान्तरय् थज्याःगु राजनीतिक पार्टीया अस्तित्व तकं मदइगु खँय् राजनीतिक पार्टी सचेत मजूगु खनाः अजूचायेमाःगु अवस्था जुयाच्वंगु दु। राजनीतिक व्यक्तिगत लाभहानीया निंतिं मखु धइगु खँ गबलय् तक नेतातय्सं थुइके फइमखु अबलय् तक आःया जनतां उमित पत्याः याइमखु धइगु खँ थुइकेगु गुबलय् ? छु जनतां न्ह्याबलें नेतातय्सं छु छु धाल उकियात स्वीकार याइ ला ?