न्हापांम्ह मिसा च्वमि मोतिलक्ष्मी उपासिकाया बुन्हि हन
येँ (नेपालाभाषा टाइम्स) – नेपालभाषा मिसा खलःया ग्वसालय् खलःया संस्थापक नायःलिसें नेपाः दकलय् न्हापांम्ह मिसा च्वमि मोतिलक्ष्मी उपासिकाया ११७ क्वःगु बुन्हि छगू ज्याझ्वःया दथुइ हन । नेपालभाषा मिसा खलःया स्वयम्भूच्वंगु जिथि भलसा छेँय् दिल्लाथ्व द्वादशि, ने.सं. ११४६ आइतवाःकुन्हु उगु ज्याझ्वः जूगु खः।
मिसा खलःया नायः धर्मशोभा तुलाधरया सभापतित्वय् जूगु ज्याझ्वलय् मिसा खलःया पुलांम्ह नायःलिसें संरक्षक सुवर्णकेशरी चित्रकारया प्रमुख आतिथ्यताय् न्ह्याःगु ज्याझ्वलय् मिसापिनिगु निंतिं प्रेरणाया स्रोत जुयादीम्ह मोतिलक्ष्मी उपासिकाया किपाय् मिसा खलःया ज्यासना पुचः, जः, उपस्थिति साहित्यह्यमिपिंसं स्वां देछानादीगु खः ।
ज्याझ्वलय् बाखं च्वमि मय्जु नःलि वज्राचार्यं न्हापांम्ह मिसा च्वमिलिसें साहित्यकार मोतिलक्ष्मी उपासिकायात थम्हं मचांनिसें म्हसिउगु व वय्कःया हे हःपाः व प्रेरणां थः नं नेपालभाषाया साहित्य ख्यलय् दुहां वयागु खँ कनादिल । लिसें वय्कलं मोतिलक्ष्मी उपासिकाया ‘पासा’ नांया च्वखँ नं ब्वनाः न्यंकादीगु खः ।
नुगःखँ तयेगु झ्वलय् सह प्रा. मय्जु उर्मिला ताम्राकारं थः एसएलसी बियाच्वनागु इलय् वय्कःया बारे व वय्कःया च्वखँ ब्वनाः मिसापिंसं नं न्ह्यागुं ज्या यायेफु धइगु भाव ब्वलंगु खँ कनादिसें वय्कःया थ्व हे प्रेरणां थम्हं कयागु अनुभव कनादीगु खः ।
अनागारिका श्रद्धाचारी गुरुमांनं मोतिलक्ष्मी उपासिकाया साहित्यिक, सामाजिक, थेरवाद बुद्धधर्मया ख्यलय् वय्कलं यानादीगु योगदानयात कयाः कनाबिज्यासें वय्कःनापया थःगु अनुभवया खँ कनाबिज्याःगु खः । वसपोल गुरुमां नं पंचशील बियाबिज्यासे थःगु नुगःखँ तयाबिज्याःगु खःसा वयांलिपा पुण्यानुमोेदन याकाबिज्याःगु खः ।
मूपाहांलिसें खलःया संरक्षक चित्रकारं मोतिलक्ष्मी उपासिकां नेपालभाषा साहितय ख्यःयात च्वन्ह्याकेत आपालं मूवंगु व ज्वःमदुगु योगदान बियादीगु खँ कनादीगु खः । लिसें मोतिलक्ष्मी उपासिकां समाजया निंतिं मेमेगु नं आपालं याना यानादीगु खँ कनादिसें उकियात झीसं न्ह्याबलें नं कदर याना च्वनेमाःगु व वय्कःया योगदानयात लुमंका तयेमाः धयादिल ।
मिसा खलया नायःलिसें ज्याझ्वःया सभापति तुलाधरं मोतिलक्ष्मी उपासिका बहुआयामिक व्यक्तित्व जूगु खँ कनादिसें वय्कलं बियादीगु योगदानया बारे चर्चा यानादीगु खः । ज्याझ्वलय् खलःया छ्याञ्जे प्रेमहिरा तुलाधरं लसकुस यानादीगु खः ।
न्हापांम्ह मिसा च्वमि मोतिलक्ष्मी उपासिकाया जन्म ने.सं. १०२९ दिल्लाथ्व द्वादशिकुन्हु येँया न्यतस्थित तुंछेगल्लिइ जूगु खः । वय्कःया साहु द्रव्यधर तुलाधर व ज्ञानलक्ष्मी तुलाधरया म्ह्याय् व नेपालभाषाया महाकविलिसें कविकेशरी चित्तधर हृदयया केहें खः ।
LEAVE YOUR COMMENTS