ने. सं. ११४६ तछलागा त्रयोदशी -

नगर प्रहरी सतकय् खनेमदयेवं लाःथेपाःथे पार्किङ (किपा)

येँ (नेपालभाषा टाइम्स) – गणेश नेपाली आत्मदाह घटना लिपा येँ महानगरपालिका प्रहरी बलया प्रहरी सतकय् कुहां वयाच्वंगु मदु । मनपा प्रहरीया कारणं नेपालीं आत्मदाह याःगु धकाः सामाजिक सञ्जाल लगायत थीथी सञ्चार माध्यमय् समाचार वयेवं येँ मनपाया प्रहरी बलयात आक्रमण जुइफइगु अनुमान यासें प्रहरी बल सतकय् कुहां मवःगु खः । येँ मनपाया प्रहरी बल सतकय् खनेमदयेवं लाःथेपाःथे सतकय् पार्किङ याइगु प्रवृत्ति नं अप्वया वंगु दु ।

थ्वहे झ्वलय् येँ मनपां सञ्चालन यानाच्वंगु धरहरया पार्किङ नं बन्द जुयाच्वंगु दु । वंगु स्वन्हु न्ह्यवंनिसें अन पार्किङ बन्द जुयाच्वंगु जानकारी अन हे खटे जुयाच्वंम्ह ट्राफिक प्रहरीं ‘नेपालभाषा टाइम्स’ यात कनादीगु दु । धरहरा अन्डरग्राउण्ड पार्किङ बन्द जुइवं पिने हे खुल्ला थासय् पार्किङ यायेगु ज्या जूगु दु । धरहराया पार्किङ बन्द जुइवं गुलिखें सेवाग्राहीत धाःसा मारय् लाःगु दु । धरहराय् पार्किङ यायेत वःपिं सेवाग्राही पार्किङ मदयेवं येँ मनपायात हे ब्वः बियाः वनेगु ज्या यानाच्वंगु दु । थ्वहे झ्वलय् धरहराय् पार्किङ यायेत वःम्ह छम्ह ल्याय्म्ह आक्रोश प्वंकूसें धयादिल, ‘थन पार्किङ चाली धकाः वयागु तर पार्किङ धाःसा बन्द जुयाच्वंगु दु । थन पार्किङ बन्द यायेमाःगु कारण छु ? मेगु छुं ज्या मदयेवं येँ मनपां पार्किङ नं बन्द यायेमाःगु ला ?’

आपालं मनूत धरहराय् पार्किङ यायेत वयाच्वंगु दुसा पार्किङ बन्द जुइवं अन हे खटे जुयाच्वंम्ह ट्राफिकयाके छाय् बन्द जूगु धकाः न्यनेगु ज्या नं जुयाच्वंगु दु । उकथं पार्किङ यायेत वइपिं पार्किङ छाय् बन्द जूगु धकाः न्यंपिंत उम्ह ट्राफिक जवानं थुकथं लिसः बियाच्वंगु दु, ‘उकुन्हुया घटना लिपा नगर प्रहरी गनं नं गने दयाच्वंगु मदु । अथे जुयाः थन नं नगर प्रहरी मवःगुलिइ बन्द जूगु खः ।’

थन सुचं नं तिकातःगु मदु धकाः न्यंगु न्ह्यसःया लिसलय् ट्राफिक जवानं धाल, ‘मनपाया प्रहरी हे सतकय् वयाच्वंगु मदुसा सुनां वयाः सुचं तिकः वइ ? आः वार्ता जुयाः समस्या मज्यंतले थनया पार्किङ चालीगु अवस्था मदु ।’

पार्किङ मचाःगु बारे येँ महानगरपालिकाया सूचना अधिकारीतय्त फोन यानाः न्यनेकने यायेगु कुतः यानागु खःसा वय्कःपिसं फोन धाःसा ल्ह्वनामदी ।