स्वाभिमान

हिन्दी चिबाखं
ज्ञानदेव मुकेश

डाइनिंग टेबिलया प्यपां तुति ह्वालुइ धुंकल । जा नयेबलय् जिमित भुखाय् ब्वः थें च्वनावइ । थ्व समस्या ज्यंकेत जिमित छम्ह बांलाःम्ह सःम्ह सिँकःमि मालाच्वंगु दु । इलय् हे अज्याःम्ह सिँकःमि भाग्यं चू हे लात । उम्ह सिँकःमिं छम्ह कुशल सर्जनं थें प्यपां तुतियात न्हूगु जीवन बियाबिल । छेँय् दुगु मेमेगु फर्निचर नं चिधंगु तःधंगु ल्वचं कयेकाच्वने धुंकूगु दु ।

आः न्हिछिया निंतिं छेँय् डाक्टर वःगु दुसा धन्दा छुकिया ? उम्ह तसकं ज्या सःम्ह सिँकःमिं टाकटुक यानाः इमिगु नं उपचार याना हे बिल । गुलि ध्यबा बी माली थें च्वंगु खः उलि ध्यबा उम्ह ज्या सःम्ह सिँकःमियात बियाबिया । व लय्लय्तायाः वन ।डाइनिंग टेबिलया ल्वय् लायेकूगु तःन्हु मदुनि । जा नयेबलय् चिसकं भुखाय् ब्वयेगु हानं सुरु जुल । जिमित व ज्या सःम्ह कालिगड खनाः तं वल ।

खास ला ल्वय् दुनेयागु खः । सिँ दुनें दुनें भ्वाभः जूगु जुयाच्वन । तर कलातं दोष दक्वं सिँकःमिया छ्यनय् दिकेत स्वल । वं धाल, ‘सिँकःमिं बांलाक छाय् मदयेकूगु ?’सिँकःमियात हाकनं सःतके छ्वया । व हानं छुं भचा आम्दानी जुइगु आशां लय्तायाः वल । थ्व पालय् वं स्टीलया पातां ज्वंकाः प्यपां तुति बल्लाकाबिल । अनंलि वं टेबिल ज्वनाः संका स्वल, अले क्यनाः धाल, ‘स्वैदिसँ, आः थ्व सनी मखु ।’

व दनाच्वन छुं भतिचा ध्यबा बी ला धकाः । तर कलातं तप्यंक हे मबीगु खँ ल्हात । वं न्ह्यसः तल, ‘छगू ज्याया ‘हानं छुकिया ध्यबा ।’
सिँकःमिया ख्वालय् ह्वयाच्वंगु आशा खुल्ला फसय् तयातःगु कपू थें तनावन । व निराश व दुःखी जुयाः पिहां वन, अले स्वाहानें कुहां वन । जिं थ्व अन्याय स्वये मफुत । जि वयागु लिउलिउ ब्वाँय् वना । जिं वयात पनाः धया, ‘दुःख तायेकेमते । जिं छुं भचा ध्यबा बी । ना, का ।’

वं ध्यबा कायेत अस्वीकार यानाः धाल, ‘सर, छि जिगु दुःखय् झायादीमते । ध्यबा बिल धाःसा छिकपिनि कलाः दुःखी जुइ । जितः वय्कःयात दुःख तायेके बी मयः । जिपिं गरीब खः । जिमिगु दुःखया छु खँ ।’ अले व जिगु ल्हाः फ्यनाः तीव्र गतिं दुःखया छगू चिब्यागु गलीइ तनावन ।
भाय्हिउम्ह ः रमेशकाजी स्थापित