कार्टुनया कारणं स्यायेगु धम्की

भारतय् बलात्कार विरोधी कार्टुन च्वंम्ह छम्ह मिसाम्ह कार्टुनिष्टयात सामाजिक सञ्जालय् तच्वःगु धम्की वःगु दु । कार्टुन च्वःमह स्वाति वडलामुडीं थःत न्ह्याथें ज्याःगु धम्की वःसां झुके मजुइगु खँ धाःगु दु । स्वातिया कार्टुनं हिन्दू द्यः राम व वया कलाः सीता दथुइ खँल्हाबल्हा जुयाच्वंगु दु । उकी सीतां रामयात धयाच्वंगु दु, ‘जि लय्ताः कि जितः दानवतय् जुजु रावणं अपहरण यात, न कि छं भक्ततय्सं ।’

भारतय् जूगु छुं बलात्कारया मामिलाय् कट्टर हिन्दीवादीतय्सं बलात्कारीया समर्थन याःगु विरोधय् स्वातिं थ्व कार्टुन दयेकूगु खः । थ्व कार्टुन सामाजिक सञ्जालय् भाइरल जुयाच्वंगु दु । हिन्दू धार्मिक ग्रन्थ रामायणया पात्रत छ्यलाः कार्टुन च्वल धकाः हिन्दीवादी संगठनतय्सं विरोध यानाच्वंगु दु ।भारत प्रशासित कश्मीरया कठुआ जिल्लाय् च्यादँ दुम्ह मिसामचायात सामूहिक बलात्कार व हत्या याःगु घटनाय् बलात्कारीतय् समर्थनय् याःगु ¥याली बिजेपीया निम्ह मन्त्रीतय्सं ब्वति काःगुलिं भारतन्यंकं विरोध जुयाच्वंगु दु ।

अथेहे उत्तर प्रदेशया उन्नाव जिल्लाय् छम्ह मिसां बिजेपीया विधायकयात बलात्कार याःगु द्वपं बिउगु दु । थ्व लिपा द्वपं बिउम्ह मिसां आत्मदाह यायेगु कुतः याःगु खः ।कार्टुनिष्ट स्वाति वडलामुडीं धाःगु थ्व निगुलिं घटनाय् भारतया सत्तारुढ पार्टी बिजेपीया नेतात दुथ्यानाच्वंगु दु । चाहे नेतातय्सं अपराध याःगु जुइमा वा अपराधीया समर्थन यायेगु जुइमाः ।

अपराधीतय् बचाउ यायेत कुहां वःपिं मन्त्री, नेतात थःपिंत रामभक्त धाइपिं खः । वडलामुडीं धाःगु दु, ‘थुपिं घटनाया विभत्सता खनाबलय् धाथें रामभक्ततय्सं सीताया अपहरण याःगु जूसा छु जुइगु जुइ धयागु बिचाः वयाच्वंगु दु ।’थ्व कार्टुन पिहां वयेवं सामाजिक सञ्जालय् वयात धम्की वयाच्वंगु दुसा गुलिसिनं वयात ज्वनेत नं माग याःगु दु ।

सम्बन्धित बुखँ

LEAVE YOUR COMMENTS