इथियोपियाय् सेनाध्यक्षया हत्या
इथियोपियाया सेनाध्यक्षयात वया हे अंगरक्षकं गोलीं कयेकाः स्यानाबिउगु दु । प्रधानमन्त्री एबी अहमदं इथिपियोयाया उत्तरय् लाःगु अमहारा धाःथासय् शनिवाः सेनाध्यक्ष सियरे मेकोनेन व मेम्ह छम्ह सेना अधिकृत सीगु खँ धाःगु दु । अथेहे मेगु छगू घटनाय् अमहाराया गभर्नर एम्बाशिउ मेकोनेन व वया छम्ह सल्हाकारयात नं स्याःगु दु ।
प्रधानमन्त्री अहमदया कथं सत्ता पल्टे यायेगु निंतिं जूगु कुतःयात पनेगु झ्वलय् सेनाध्यक्ष सियरे सीगु खः । सरकारं सत्ता पल्टे यायेत वःपिं तःम्हेसिया गिरफ्तारी लिपा स्थिति नियन्त्रणय् दुगु खँ धाःगु दु । प्रधानमन्त्री अहमदं टेलिभिजनय् सैनिक वसतय् हे वयाः छगू सम्बोधन यासें देय् कुचा थलेत स्वयाच्वंपिं तत्व विरुद्ध छप्पँ जुइत जनतायात अपील यानादीगु दु ।
थ्वहे दथुइ अमेरिकी विदेश विभागं राजधानी अदिस अबाबाय् च्वनाच्वंपिं थः कर्मचारीतय्त छेँय् हे च्वनाच्वनेत धाःगु दु ।इथियोपियाय् छुं ई न्ह्यव निसें जातीय हिंसा तच्वया वयाच्वंगु दु । थगुने जूगु चुनाव लिपा प्रधानमन्त्री अहमदं थीथी सुधारया ज्या न्ह्याका वयाच्वंगु दु ।
वय्कलं राजनीतिक दमन दिकेगु निंतिं तःम्ह राजनीतिक बन्दितय्त रिहा यानाः राजनीतिक पार्टीतयत् तयातःगु प्रतिबन्ध चिकेगु व मानवअधिकार उल्लंघन याःपिं अधिकारीतय्त मुद्दा न्ह्याकेत आदेश बियादीगु खः । सरकारं अमहारा प्रान्तया स्थानीय सुरक्षा प्रमुख ब्रिगेडियर जनरल असामिनेव सीजयात सत्ता पल्टे यायेत षडयन्त्र यानाच्वंगु द्वपं बिउगु दु ।
LEAVE YOUR COMMENTS