नेपाःप्रति चिन्तित अन्नान मंत

येँ – संयुक्त राष्ट्र संघया पुलांम्ह महासचिव कोफी अन्नान म्हिगः मंत । ८० दँ दुम्ह वय्कः घानाया नागरिक खः । उसाँय् मदयाच्वंम्ह वय्कः स्वीट्जरल्याण्ड बर्नस्थित छगू अस्पतालय् वासः याकुयाकुं मदुगु खँ कोफी अन्नान फाउण्डेशनं धाःगु दु ।

नेपालय् माओवादी जनयुद्धया कारणं आपालं मनूत सिनाच्वंगु खँयात ध्यानय् तयाः वय्कलं हे द्वन्द्व मदयेकेत राष्ट्र संघीय ग्वाहालिया पहल यानादीगु खः । वय्कलं कयादीगु पहल हे विकसित जुया वनाः अन्तिमय् माओवादी लडाकुतय्त शिविरय् निगरानी तयेगु जिम्मा राष्ट्र संघीय मिशन अनमिनं याःगु खः । उकिया लागिं मिशन प्रमुख जुयाः इयान मार्टिन नेपाः वःगु खः ।

अबले नेपालय् शान्ति पलिस्थाया लागिं राष्ट्र संघीय महासचिव अन्नानया विशेष दूत जुयाः उपमहासचिव भाजु सामुयल ताम्राट नेपाः वइगु खः ।

वय्कलं शान्ति वार्ताया सहजकर्ता पद्मरत्न तुलाधर लगायत थीथी मनूतय्त नापलानाः शान्ति प्रक्रिया ताःलाकेत भूमिका म्हितादीगु खः ।
अबले शान्ति वार्ताया पहल यानादीम्ह मानवाधिकारवादी नेता पद्मरत्न तुलाधरं कनादी कथं कोफी अन्नानं तयार याःगु राष्ट्रसंघीय महासचिवया प्रतिवेदनय् नेपाःया द्वन्द्व बारे समेत उल्लेख यासें थ्व द्वन्द्व समाधान यायेगु खःसा नेपालय् थःपिनि ‘गुड अफिस’ चायेकाः ग्वाहालि याये फइ धकाः उल्लेख यानातःगु खः । अन्नानया वहे खँयात आधारय् माओवादीं राष्ट्र संघलिसे स्वापू तयाः लडाकु निगरानी याकेगु ज्या याःगु खः ।

भाजु तुलाधरं धयादी, ‘अन्नान थः हे नेपाः मवःसां वय्कः नेपाःया शान्ति प्रक्रियाय् चिन्तित खः धइगु सीदु । वय्कलं प्रतिनिधि दयेकाः छ्वया हःम्ह सामुयल ताम्राथलिसे जिगु बरोबर सम्पर्क जू ।’शान्तिया लागिं नोवल सिरपाः समेत त्याकादीम्ह अन्नान राष्ट्र संघया न्हापांम्ह अफ्रिकी महासचिव खः । वय्कः सन् १९९७ निसें २००६ तक महासचिव जुयादीगु खः ।