रुसया प्रतिरोध यायेत नेटों विस्तृत योजना हइगु

एजेन्सी- लिथुआनियाय् मंगलवाः व बुधवाः जुइगु नेटो बैठकय् यदि रुसं छुं नं नेटोया दुजः देशय् आक्रमण यात धाःसा गुकथं प्रतिरोध यायेगु धयागु बारे विस्तृत योजना सहित सहलह जुइत्यंगु दु । शीतयुद्ध लिपा नेटो सैन्य गठबन्धनं रुसविरुद्ध दयेकेत्यंगु थ्व दकलय् गहन व महत्वपूर्ण योजना जुइगु खँ धाःगु दु । थ्व बैठकं युक्रेन युद्ध व नेटोया समग्र भविष्ययात हे न्हूगु मोडय् यंकीगु खँ नं धाःगु दु । थ्व बैठक लिपा नेटोलिसे आवद्ध देय्तय्सं पूर्वी युरोपय् थःपिनि सैन्य उपस्थिति अप्वयेकीगु सम्भावना दु ।

थ्वहे झ्वलय् युक्रेनयात नेटोया दुजः दयेकेगु बारे नं सहलह जुइगु खँ धाःगु दु । नेटोया प्रमुख जेन्स स्टोल्टेनबर्गं युक्रेनयात नेटोया दुजः जुइगु खँय् सकारात्मक सुचं वनीगु खँ धाःगु दु । युक्रेनयात नेटोया दुजः दयेकेगु खँय् धाःसा थुकिया मेपिं दुजः देय्तय् दथुइ हे मतभेद दनि । नेटोया दुजः जुइत थुकी न्हापा जुयाच्वंपिं सकसिनं स्वीकृत बीमाः । सुं छगू देशं जक मज्यू धाःसां दुजः जुइफइमखु ।

स्वीडेन नेटोया दुजः जुइगु खँय् टर्कीं यानाच्वंगु विरोधयात लित कायेधुंकूसां युक्रेनयात सदस्यता बीगु खँय् धाःसा नेटो दुजःतय् दथुइ असहमति दनि ।

नेटो निक्वःगु विश्वयुद्ध लिपा युरोपय् रुसया विस्तार पनेगु निंतिं दयेकूगु सैन्य संगठन खः । सन् १९९१ य् सोभियत संघया विघटन लिपा पूर्वी युरोपय् नेटोया संगठन विस्तार जुयावयेवं रुसं थःपिनिगु सुरक्षा जोखिमय् लाःगु धया वयाच्वंगु खः । युक्रेनयात नेटोया दुजः दयेकेगु खँय् रुसं तच्वःगु विरोध याना वयाच्वंगु खःसा थ्व हे कारणं वं युक्रेनय् आक्रमण याःगु खः ।

युक्रेन नेटोया दुजः जुल धायेवं थुकिया सैन्य बल रुसया तसकं सतिक च्वंवइगु मस्कोया चिन्ता दु । वंगु अप्रिलय् फिनल्यान्ड नं नेटोया दुजः जुइवं आः नेटो संगठन रुसया सीमालिसे स्वाःवःगु दु ।

नेटोया नीति धयागु थ्व संगठनया दुजः देशय् सुनां नं आक्रमण यात धाःसा संगठन हे जानाः उकिया प्रतिकार याइगु जुइ । थ्व हे नीति कथं आः रुसं छुं नं नेटो दुजः देशय् आक्रमण यात धाःसा गुकथं प्रतिरोध यायेगु धयागु योजना पारित यायेत्यंगु खः । नेटोया सैन्य कमान्डरतय्सं दयेकूगु थ्व योजनाय् रुसयात आक्र्टिक व नर्थ एटलान्टिक (उत्तर आन्ध्र), मध्य युरो व भूमध्यसागरमध्ये गनं आक्रमण यायेमाल धाःसा सैनिकत गन वनेगु, अन छु यायेगु धयागु सटिक योजनात दुगु खँ धाःगु दु ।

‘रोयल युनाइटेड सर्भिसेज इन्ष्टिच्यूट नांया छगू थिङ्कट्यांकया सहायक निर्देशक मल्कोम चाल्मर्सं थ्व सन् १९९१ या शीतयुद्ध अन्त्य लिपा नेटोया दकलय् तःधंगु विस्तृत योजना धाःगु दु । चाल्मर्सं धाःगु दु, ‘सोभियत संघ विघटन जुइधुंकाः युद्धया जोखिम थ्यंमथ्यं मंत धयागु खनेदुगु खः, तर सन् २०१४ य् रुसं क्राइमियायात गाभे याःगु व युक्रेनय् युद्ध सुरु यायेवं जोखिम अझ नं दनि धयागु खनेदुगु दु । विशेषत बाल्टिक देशय् ।’

युक्रेन नेटोया सदस्य छाय् जुइ मफयाच्वन ?
सन् २००८य् नेटों भविष्यय् युक्रेन नं थःपिनि संगठनया दुजः जुइफइगु खँ धाःगु खः । नेटोया थ्व उद्घोष लिपा रुस झन् तम्वःगु खःसा थ्व हे कारणं युक्रेनय् आक्रमण याःगु खः । तर आः नेटो युक्रेनयात तुरन्त दुजः दयेकत तयार जुयाच्वंगु मदु । युक्रेनं फास्ट ट्य्राकं थःपिंत नेटोया दुजः दयेकेत आवेदन बिउसां नेटो तयार मदुनि ।

थुकीया मू कारण धयागु नेटोया देय्त रुसलिसे तप्यंक युद्धय् वनेमाली धकाः खः । नेटोया बडापत्रया धारा ५ य् छुं नं दुजः देय्यात आक्रमण जुल धाःसा मेपिं सकलें देय्तय्सं प्रतिरक्षा यायेमाः धकाः च्वयातःगु दु । यदि आः थथे युक्रेन आवद्ध जुल धाःसा मेगु देय्त फुक्कं रुसलिसे युद्धय् दुब्वाःवनेमाली ।

थ्व हे कारणं नेटो आः तुरुन्त युक्रेनयात सदस्य दयेकेत तयार मजुयाच्वंगु खः । अथे खःसां थुपिं देय्तय्सं रुसविरुद्ध युक्रेनयात तःधंगु मात्राय् सैन्य सामग्री ग्वाहालि याना वयाच्वंगु दु ।