सुशान्तया हत्या जूगु मखु

एजेन्सी – भारतया दिल्लीइ च्वंगु एम्स अस्पतालया मेडिकल बोर्डं अभिनेता सुशान्त सिंह राजपूतयात विष नकाः हत्याः याःगु धइगु आशंकायात खारेज यानाबिउगु दु। एम्स अस्पतालया मेडिकल बोर्डं सीबीआईयात बिउगु अन्तिम रिपोर्टय् थ्व खँ न्ह्यथनातःगु खँ ‘द टाइम्स अफ इन्डियां’ च्वःगु दु। थ्व रिपोर्टय् सुशान्त सीगुया सही कारण न्ह्यथनातःगु खँ धाःगु दु ।

बोर्डया अध्यक्ष डा. सुधीर गुप्तां टाइम्स अफ इन्डियालिसे खँ ल्हासें धाःगु दु, ‘फोरेन्सिक टिमं याःगु परीक्षणया लिच्वः सुयातं कने मजिउ, छाय्धाःसां थ्व मुद्दा विचाराधीन दु। अनुसन्धान यानाच्वंपिं सीबीआईयात थ्व रिपोर्ट बीधुनागु दु ।’

अभिनेता राजपूतयात वंगु जून १४ तारिखय् मुम्बइलय् च्वंगु थःगु हे छेँय् झुन्डे जुयाः सीनाच्वंगु अवस्थाय् लुइकूगु खः । वं आत्महत्या याःगु खँ मुम्बइ प्रहरीं धाःगु खः, तर वयागु हत्या नं जूगु जुइफु धकाः सः तच्वया वयेवं सीबीआई मार्फत अनुसन्धान न्ह्याकूगु खः ।

सीबीआईया हे इनापय् एम्सं मेडिकल बोर्ड गठन यानाः सुशान्त च्वनाच्वंगु छेँया नं फोरेन्सिक जाँच याःगु खः । सुशान्तया पोस्टमार्टम याःपिं कूपर अस्पतालया डाक्टरतय्के नं बोर्डपाखें अन्तर्वार्ता काःगु खः । मेडिकल बोर्डं लछि तकया अनुसन्धान लिपा थ्व निष्कर्ष पिकाःगु खः ।