ट्रम्प अस्पतालं लिहां वन

एजेन्सी – कोरोना भाइरसया सफल उपचार लिपा अमेरिकी राष्ट्रपति डोनाल्ड ट्रम्प अस्पतालं लिहां वंगु दु। स्वन्हु अस्पतालय् च्वनेधुंकाः ट्रम्प ह्वाइट हाउस लिहां वंगु खः । वय्कलं आः याकनं हे थःगु चुनावी अभियानय् ब्वति काइगु खँ धाःगु दु ।

अस्पतालं हेलिकप्टर पाखें ह्वाइट हाउस वंम्ह ट्रम्पया उपचार ह्वाइट हाउसय् नं जारी हे जुइगु खँ चिकित्सकतय्सं धाःगु दु। ह्वाइट हाउस थ्यनेधुंकाः राष्ट्रपति ट्रम्पं धाःगु दु, ‘धाथें आराम महसुस यानाच्वनागु दु। कोभिड खनाः ग्यानादीमते ।

ह्वाइट हाउस थ्यनेधुंकाः वय्कः याकःचा च्वनाच्वंगु किपा पिहां वःगु दु। उकी नं वय्कलं सैनिकतय्सं थें अभिभावदन याये न्ह्यसः मास्क लिकयातःगु खनेदु। वय्कःया उपचारय् संलग्न डा. सीन कोन्लीं ट्रम्पया स्वास्थ्य सुधार जुयाच्वंसां पूर्ण रुपं ठीक मजूनिगु खँ धाःगु दु। वय्कःया वाःया न्हयन्हुं, २४ सै घन्टा विश्वया उत्कृष्ट चिकित्सकतय् निगरानीइ दइगु खँ डा. कोन्लीं धयादीगु दु ।

अस्पतालं विदा जुइगु झ्वलय् वय्कलं सकसितं सुभाय् बियादीगु दु, तर छुं नं न्ह्यसःया लिसः धाःसा बियादीगु मदु। वय्कःयात छम्ह संववादातां छु छि सुपर स्प्रेडर खः ला धकाः न्ह्यसः तःगु खः ।

थ्वहे दथुइ ह्वाइट हाउसय् थप कर्मचारीतय्त संक्रमण पुष्टि जूगु दु। ट्रम्पलिसे सतिपिं म्होतिं नं १२ म्हेसिके पोजिटिभ खनेदुगु दु। मेखे कोरोना संक्रमणया हे इलय् अस्पतालं गाडीइ च्वनाः चाःहिउवःगु खँ यात कयाः राष्ट्रपतिया तःधंगु आलोचना नं सुरु जूगु दु। वय्कः थथे चाःहिउवःगु कारणं वय्कःया सुरक्षाय् खटे जुयाच्वंपिं सुरक्षाकर्मी, गाडी चालक नं जोखिमय् लाःगु धासें वय्कःया आलोचना जूगु खः ।