ट्रम्प राष्ट्रपति पदया निंतिं अयोग्य

अमेरिकाया संघीय अनुसन्धान निकाय (एफबीआई)या पुलांम्ह निर्देशक जेम्स कोमीं डोनाल्ड ट्रम्प राष्ट्रपति पदया निंतिं नैतिक रुपं योग्य मजूगु खँ धयादीगु दु । मिस्तय्त ट्रम्पं याइगु अपमानजनक व्यवहारया कारणं राष्ट्रपति जुइत योग्य मजूगु खँ वय्कलं धयादीगु खः ।एबीसी न्युजयात छगू अन्तर्वार्ता बिसें कोमीं रुसयाके ट्रम्पयात ब्लाय्कमेल यायेगु छुं सामग्री दयेमाःगु बिचाः नं प्वंकादीगु खः ।

राष्ट्रपति ट्रम्पं न्याययात पनेगु ज्या यानाच्वंगु प्रमाण दुगु खँ नं कोमीं धयादीगु खः । ट्रम्पं धाःसा कोमीया आलोचना यासें ठग व ज्यालगे मजूम्ह मनू धकाः धाःगु दु ।कोमीं ट्रम्प राष्ट्रपतिया जिम्मेवारी कायेन मानसिक रुपं अयोग्यम्ह मखुसां निरन्तर मखुगु खँ ल्हानाच्वनीगु व मिस्तय् बारे वयागु धारणाया कारणं असक्षम जूगु खँ धयादीगु खः ।

वय्कलं ट्रम्पयात सत्य खँया खास हे महत्व मदुगु टिप्पणी नं यानादीगु दु ।कोमीं धयादगिु दु, ‘राष्ट्रपतिं देय्या आधारभूत मान्यतायात सम्मान व पालना यायेमाः । दकलय् महत्वपूर्ण खँ सत्य खः । तर राष्ट्रपतिं अथे याये फयाच्वंगु मदु ।’ट्रम्प व कोमी दथुइ ताःई न्ह्यव निसें द्वन्द्व जुयाच्वंगु दु । कोमीं थःगु आत्मकथा पितहयेत्यंगुलिं नं निम्ह दथुइ विवाद तच्वया वयाच्वंगु दु ।