चीनय् हाकनं कोरोना संक्रमित अप्वल, वुहानय् लकडाउन चिइकल

एजेन्सी– चीनय् हाकनं कोरोना भाइरसया संक्रमण अप्वया वःगु दु । अनया नेशनल हेल्थ कमिसनं लिपांगु २४ घौ दुने कोरोना भाइरसया ६२ गू न्हूगु संक्रमण खनेदुगु खँ धाःगु दु । अथेहे १३७ गू अज्याःगु घटना न्ह्यःने वःगु दु गुकी छुं नं कथंया स्पष्ट लक्षण खनेमदु । थ्व ल्याः थ्वयां छन्हु न्ह्यवया स्वयां अप्वः खः । सोमवाः कोरोना भाइरसया संक्रमणया न्हूगु घटना ३२ गू जक खनेदुगु खःस स्पष्ट लक्षण मदुगु घटना ३० गू जक खनेदुगु खः ।

मंगलवाः चीनय् कोरोना संक्रमणं थप निम्हेसिया ज्यान नं वंगु दु । सोमवाः धाःसा न्हापांखुसी छम्हेसिया हे ज्यान मवंगु खः । मंगलवाः छम्हेसिया मृत्यु संघाइलय् जूगु खःसा मेम्हेसिया मृत्यु हुबे प्रान्तय् जूगु खः । हुबे प्रान्त दकलय् न्हापां कोरोना खनेदुगु वुहान शहर लाःगु प्रान्त खः ।

मेखे चीन सरकारं थनिंनिसें वुहानय् तयातःगु लकडाउन धाःसा चिइकूगु दु । चीनं छ्यलाच्वंगु स्वास्थ्य सम्बन्धी एपय् ‘वाउँगु’ कोड खनेदुपिं मनूत न्हापांखुसी वुहान सहरं पिहां वनेखनीगु जूगु दु । लकडाउन चिइकेवं थन यातायातया फुक्कं साधन नं हाकनं संचालनय् हःगु दु । झिंछवाःया लकडाउन लिपा बुधवाः वुहानं न्हापांगु ट्रेन संचालन जूगु दु ।