
एजेन्सी- अफगानिस्तानया तालिबान सरकारं मिस्ततय्त थप प्रतिबन्धया घोषणा याःगु दु । तालिबान सरकारं मिस्तय्सं टेलिभिजनय् प्रसारण जुइगु नाटकय् म्हिते मदइगु नियम हःगु दु । अथे हे मिसा पत्रकार व टेलिभिजनय् मिसापिं प्रस्तोतातय्सं छ्यं त्वपुइगु (हिजाब) अनिवार्य याःगु दु ।
तालिबानतय्सं सत्ता कायेधुंकाः मिस्तय्त नं अधिकार बीगु धाःसां व्यवहारय् धाःसा खनेदयाच्वंगु मदु । अझ तालिबानतय्सं मिस्तय्त थप प्रतिबन्ध तयावयाच्वंगु दु । तालिबानया मिसा मस्त स्कुल वनेखनाच्वंगु मदु । थुखे तालिबानया मिसा कासामितय्त नं प्रतिबन्ध तये धुंकूगु दु ।
अफगानिस्तानया टेलिभिजन च्यानलया निंतिं तालिबान सरकारं च्यागू नियम जारी याःगु दु । नियमकथं इस्लाम वा शरिया कानुन एवं अफगान मूल्यमान्यताया विपरीत फिल्म वा कमेडी सिरियल क्यनेदइमखु । धर्मयात अपमान याइगु व आम अफगान नागरिकयात अपमान जुइगु हास्य व न्ह्यइपुगु ज्याझ्वलय् नं प्रतिबन्ध तःगु दु । विदेशी संस्कृतियात प्रचार याइगु फिल्म क्यनेदइ मखु । अफगानिस्तानया टेलिभिजन प्रसारण जुयावयाच्वगु अप्वः थें विदेशी नाटकय् मिस्तय्त मुख्य पात्र दयेकातःगु दु ।
अफगानिस्तानया पत्रकारतय्गु संस्थाया दुजः हुजातुल्लाह मुजाद्देदीं तालिबानं टेलिभिजनय् हःगु प्रतिबन्ध अनपेक्षित जूगु व नियम व्यवहारिक मजूगु धाःगु दु । नियम लाःगु जुल धाःसा टेलिभिजन च्यानल बन्द जुइगु नं मुजाद्देदी धाःगु दु ।
LEAVE YOUR COMMENTS