पुष्पा २ ः रिजिल न्ह्यः ६० करोड कमाइ

दक्षिण भारतीय फिल्म पुष्पा ः द रुलं रिलिज जुइ न्ह्यः हे ६० करोड कमे याःगु दु । थ्व फिल्म वइगु १६ डिसेम्बरय् जक रिलिज जुइ । थ्व फिल्म सन् २०२३ या दकलय् प्रतिक्षित फिल्म मध्ये छगू जुयाच्वंगु दु ।

अल्लु अर्जुनया फिल्म ‘पुष्पा ः द राइज’या सिक्वेल कथं दयेकूगु थ्व फिल्मया टिजर वंगु वालय् जक रिलिज जूगु खः । टिजरय् बांलाःगु रेस्पोन्स वयाच्वंगु दु ।

आः कमे याःगु धाःसा फिल्मया म्युजिक राइट्स व टेलिभिजन राइट्स पाखें खः । टेलिभिजनय् फिल्म क्यनेगु निंतिं व म्युजिकया निंतिं यानाः ६० करोड दां बिउगु खः । अझ थ्व फिल्मया ओटीटी राइट्स ला मी हे ल्यं दनि । थ्व ल्याखं फिल्मं म्युजिक, टिभी व ओटीटी राइट्सपाखें हे १०० करोड कमे याइगु खनेदुगु दु ।

पुष्पाया न्हापांगु ब्वः सन् २०२१ या डिसेम्बरय् रिलिज जूगु खः । उबलय् ब्लकबस्टर जूगु थ्व फिल्मया ‘सामी सामी’, ‘श्रीवल्ली’ व ‘ऊ अंटावा’ म्येँ तसकं हिट जूगु खः । अल्लु अर्जुन लिसें रश्मिका मंडाना, फहद फासिलया मू भूमिका दुगु फिल्मया निर्देशन सुकुमारं याःगु खः ।