ने. सं. ११४६ बछलाथ्व तृतीया - अक्षय तृतीया, भिक्षु प्रज्ञानन्द महास्थविरया १२६ क्वःगु बुदिं

क्यानाडाय् तापक्रम थहां वनाः मिं नल

एजेन्सी- क्यानाडाय् तापक्रम थहां वनाः थाय्थासय् मिं नःगु दु । ब्रिटिश कोलम्बियाय् च्वंगु लिटन नांगु गामय् तापक्रम थहां वनाः मि च्यानाः गांया ९० प्रतिशत भागय् क्षति जूगु दु । १५ मिनेटया दुने पुरा गामय् मिं नःगु खः । लिटनया मेयरं लिटनया यक्व थासय् मिं नःगु खःसा मानवीय क्षति धाःसा मजूगु खँ धयादीगु दु । वय्कःया कथं मि नयेवं बिसिउँ वःगुलिं बचे जूगु खः । क्यानाडाय् ४९.६ डिग्री तक तापक्रम थ्यंगु दु ।

मिं नयाः मानवीय क्षति मजूसां वंगु न्यान्हुया दुने तसकं तांन्वयाः सीपिनिगु ल्याः ४८६ थ्यनेधुंकूगु दु । थ्व स्वयां न्ह्यव वंगु न्यादँया तथ्याङ्क स्वयेगु खःसा उबलय् तांन्वयाः दँय् स्वम्ह निसें न्याम्हतक जक सीगु दु ।