ने. सं. ११४४ ञलागा पारू -

शंकाया घेराय् विदेशय् शुटिंग

खस् भाय् नापं नेपालभाषाया ख्यलय् नं नांजाःम्ह द्वन्द्व निर्देशक राजेन्द्र खड्गी मानव तस्करीया द्वपनय् जेलय् च्वनेत बाध्य जुल । द्वन्द्व निर्देशक खड्गी विदेशय् सांस्कृतिक ज्याझ्वः यायेगु व उकिया निंतिं कलाकारत यंकेगु नामय् उकथं मानव तस्करी याःगु द्वपं लाःगु खः । कोरियाय् मावन तस्करी याःगु द्वपनय् प्रहरीं वयात नियन्त्रणय् काःगु खः । ‘मेपिंसं यानाच्वंगु दु, उकिं जिं नं यानाः, थ्व अपराध मसिउ’ धकाः धाःगु सत्य खःसा थुकी वय्कः जक मखु मेमेपिं नं आपालं कलाकारत संलग्न जूगु दयेमाः धइगु आशंका यायेछिं । नेपाःया कला, संस्कृति विदेशय् न्ह्यब्वयेगु नामय् थुकथं सांस्कृतिक ज्याझ्वः ज्वनाः वनीपिं गुलिखे सांस्कृतिककःमि कलाकारतय्सं विदेशय् मानव तस्करी यानच्वंगु धइगु द्वपं विगतय् नं मवःगु धाःसा मखु । थज्याःगु सांस्कृतिक ज्याझ्वः ज्वनाः वनीपिं गुलिखे सांस्कृतिक पुचःयात मानव तस्करीया द्वपं लानाच्वंगुलिं इमिसं नेपालय् अन्तर्राष्ट्रिय लोक सांस्कृतिक महोत्सव यायेत्यनागु धकाः धायेगु यानाच्वंगु नं चर्चाय् वः ।

विगतय् सांस्कृतिक ज्याझ्वःया कलाकारतय्त जक लानाच्वंगु थुकथंया द्वपं लिपांगु इलय् धाःसा संकिपाकःमितय्त नं लाःगु खनेदत । उकिसनं छुं छुं संकिपाकःमितय्सं याइगु बदमासीया कारणं मुक्कं संकिपा ख्यः व संकिपाकःमित तकं बदनाम जुयाच्वनेमाःगु अवस्था वयाच्वंगु खनेदु । थुकी स्वयम संकिपाकःमितय्सं हे ध्यान बीमाःगु वा सतर्क जुइमाःगु खनेदु ।
अथेला नेपाःया खस् भाय्या संकिपा ख्यलय् क्रियाशील आपालं संकिपाकःमितय् थःथःगु हे थीथी कथंया संघसंस्था दु । थज्याःगु संघसंस्थां नं थज्याःगु खँय् ध्यान बीमाः अतिकं आवश्यक जू । संघसंस्थाया ज्या धइगु खालि अवार्ड ज्याझ्वः जक यायेगु मखसे दकलय् महत्वपूर्ण ज्या धइगु ला थज्याःगु बदमासी ज्या याइगुलिइ ध्यान बीमाः । थ्व हे झ्वलय् लिपांगु इलय् नेपाली संकिपाया शुटिंग विदेशय् यायेगु क्रम अप्वया वनाच्वंगु दु । खस् भाय्या जक मखसे नेपालभाषाया संकिपाया शुटिंग नं विदेशय् याःगु खनेदु । विदेशय् शुटिंग यायेगु नेपाःया समग्र फिल्म उद्योगय् हे छगूकथंया लहर धाये वा रहर वयाच्वंगु दु ।

अझ धायेगु खःसा धेंधेंबल्लाः थें जुयाच्वंगु दु । सीमित बजाः उकिसनं म्हो बजेटं दयेकेमाःगु नेपाःया संकिपा डलर खर्च यानाः विदेशय् शुटिंग यायेगु यानाच्वंगु दु नेपाःया संकिपाकःमितय्सं । तर विदेशय् शुटिंग याःगु धाःगु अप्वःथें नेपाली संकिपां बांलाक व्यापार याये फयाच्वंगु मदु, थ्व छगू नेपाःया संकियाख्यःया निंतिं खायुगु सत्य खः ।खय्तला विदेशय् शुटिंग याःगु धाःगु दक्वं धइथें संकिपा व्यापारया ल्याखं स्वयेगु खःसा असफल जूगु खनेदु, अय्नं थःगु संकिपा प्रदर्शन याये न्ह्यः छपु हे म्येँ जक जूसां छाय् मजुइमा विदेशय् शुटिंग यायेगु यानाच्वंगु दु । नेपाःया संकिपां बांलाःगु व्यापार यायेगु खःसा विदेशय् वनाः शुटिंग यायेम्वाः नेपालय् हे शुटिंग याःगु संकिपां नं बांलाःगु व्यापार याःगु दु । थुकिया लिपांगु छगू दसु खः खस् भाय्या संकिपा छक्का पन्जा । थुगु संकिपां नेपाःया संकिपाया इतिहासय् दकलय् अप्वः व्यापार याःगु संकिपा जुया बिउगु दु । थुकिं छु स्पष्ट याः धाःसा संकिपा हिट जुइत वा सफल जुइत विदेशय् शुटिंग यायेम्वाः, बरु उकिया बाखंचु (स्क्रिप्ट) स्यलाःगु जुइमाः, प्रस्तुतिकरण बांलायेमाः ।

विदेशय् वनाः विदेशय् वनाः संकिपाया शुटिंग यायेगुलिइ जक सीमित मजुइ धुंकूगु दु । लिपांगु इलय् संकिपाया शुटिंग विदेशय् यायेगु जक मखसे अवार्ड ज्याझ्वः तकं विदेशय् यायेगु यानाच्वंगु दु । थुकथं संकिपाया शुटिंग, अवार्ड ज्याझ्वः नापं संकिपाया प्रदर्शन तकं विदेशय् वनाः यायेगु गुगु ज्या लिपांगु इलय् अप्वयाच्वंगु दु, थुकिया लिउने सुलाच्वंगुया रहस्य धइगु गनं मानव तस्करी यायेगु निंतिं जकं मखुला धइगु खँय् नं आपालं शंका यायेथाय् दु । अप्वःथें नेपाःमिया प्रमुख गन्तव्य धइगु अमेरिका वा अस्टे«लिया खः । अले अप्वःथें नेपाःमित शुटिंगया निंतिं नं थ्व हे निगू देशय् वनेगु यानाच्वंगु दु । नेपाः छगू प्राकृतिक रुपं सुन्दर, मनोरम दृश्य दुगु देय् खः धकाः विदेशीतय्सं धायेगु यानाच्वंगु जकमखु, विदेशीत हे नेपालय् वयाः शुटिंग यायेगु यानाच्वंगु दु धाःसा, नेपाःमित छाय् विदेशय् वनाः शुटिंग यायेमाःगु धइगु न्ह्यसः दनीगु स्वाभाविक खः । अले थ्व छगू चर्चाया विषय नं खः । अथे ला विदेशय् वनाः शुटिंग हे याये मजिउ, अवार्ड ज्याझ्वः व संकिपा प्रदर्शन याये मजिउ धइगु मखु, तर अज्याःगु ज्या यायेगु नामय् अनैतिक व नेपाःया हे बेइज्जत जुइगु ज्या याये मजिउ धइगु खः ।