रुस व युक्रेन दथुइ आक्रमण, २७ म्ह सित

एजेन्सी – रुस व युक्रेनया दथुइ जुयाच्वंगु युद्ध अझ हिसांत्मक जुजुं वनाच्वंगु दु । अन्तर्राष्ट्रिय संचारमाध्यम अल जजिरायाकथं वंगु सोमवाः व मंगलवाः निगू देय्या दथुइ जूगु युद्धय् थ्यंमथ्यं २७ म्ह सीगु दुसा सलंस घाःपाः जूगु दु ।

मंगलवाः रुसी सरकारी संचारमाध्यम तासं मस्को क्षेत्रय् जूगु ड्रोन आक्रमणय् न्याम्ह सीगु व खुम्ह घाःपाः जूगु धाःगु दु । रुसया दक्षिणी क्रासोडार क्षेत्रया गभर्नरं सोमवाः छगू रिर्सोर्टय् जूगु आक्रमणय् स्वम्ह मस्तलिसें न्हय्म्ह सीगु व ४० म्हं मल्याक घाःपाः जूगु जानकारी बिउगु खः ।

अथेहे युक्रेनया सीमा बेल्गोरोद लागाय् जूगु गोलीबारीइ प्यम्ह सीगु दुसा १७ म्ह घाःपाः जूगु दु । रुसी आक्रमणं युक्रेनया थीथी थासय् आपालं मानवीय क्षति जूगु दु । युक्रेनया प्रोपेत्रोभ्स्क क्षेत्रय् च्वंगु छगू पेट्रोल पम्पय् आक्रमण जूगु दुु । पेट्रोल पम्पय् जूगु आक्रमणलिपा नापच्वंगु लागाय् मिं नःगु खः । थ्व घटनाय् स्वम्ह मस्तसहित २१ म्ह घाःपाः जूगु व ९ म्हेसिया अवस्था गम्भीर जूगु धाःगु दु । अथेहे युक्रेनया जापोरिझियाय् जूगु आक्रमणय् निम्ह मस्तलिसें च्याम्ह सीगु दु । निगुलिं देशं सर्वसाधारणयात लक्षित यानाः आक्रमण याःगु धासे छम्हं मेम्हेसित आरोप–प्रत्यारोप यानाच्वंगु दु ।

थ्व हे दथुइ संयुक्त राष्ट्र संघ व थीथी अन्तर्राष्ट्रिय संस्थां हिंसा दिकेत व वार्ताया माध्यमं समाधान यायेत इनाप याःगु दु ।